Shillong, Nailar 06 : Ka Voice of the People Party (VPP) ha ka sngi Palei kala mih sha surok ryngkat ki spah ngut ki nongkyr shan ban iatur paidbah sha Meghalaya Secretariat na ka bynta ban pynbor ia ka Sorkar Jylla ba kan shimkhia ia ki 10 tylli ki mat kaba ka ong ba ki dei ki ishu u paidbah.
Watla ka jingmih ki briew ka long kaba bun, hynrei kam shym la kot pat ia ka jingkam jong ka VPP ha ka taiew bala lah ba ong ba palat shi lak ngut ki briew kin iashimbynta ha kane ka jingiaid paidbah. Kaba kaba lyngngoh ka long ba bun na ki nongiashimbynta kim shym don jingtip ia kiei kita ki 10 mat.
Ha kane ka jingiaid paidbah, ngi la iakren bad katto katne ki nongiashimbynta bad kylli ia ki jingkylli : Na kaei ka daw ba ka VPP ka iakhih mynta ka sngi? Watla katto katne kila lah ban jubab malu mala, hynrei kiba bun ki shem jingeh ban batai ia ka daw ne jingthmu jong kane ka jingiakhih lane tip ia kita ki jingdawa ka VPP.
Kat kum ka VPP, kane ka jingiaid paidbah ka dei kaba la pynlong ban dawa pyntreikam ia ka Lum Pongdeng project ryngkat ban pyllait ia ka White Paper, ka jingpynlong ia ka eksam thungkam da ka kynhun ba laitluid ba ju leh lyngba ki DSC, MPSC bad kiwei ki agency thungkam, ka jingiada kaba khlain ia ka hok ki trai ri trai muluk, thaw ain ban teh kyndon ia ka jingkrih shnong bad ithuh ia ka jingdon paid ki trai muluk, ai biang ia ka hok ki nongshong dukan madan, ithuh ia ki khlieh nongsynshar shnong bad ki Dorbar jong ki, pyrrkhing ia ki karkhana coke bad dewbilat, iada ia ki wah, pynkut ia ka jingtih shyiap bad maw pathar bad ka jingbret ia ki jaboh sha ki tyllong um bad ka jingleh tyngeh pyrshah ia ka jingtih dewiong beain, khaii bad ki syndicate kiba kynnoh donkti.
Watla, kine ki dei ki mat ba pynlong ia kane ka jingiaid paidbah, kiba bun ki nongkyrshan bala iakren, kim shym la lah ban batai ia ki.
Kane ka jingiakhih kala wan jia ruh tang lai taiew shuwa hashuwa ka Dorbar Synrai jong ka Iingdorbar Thaw Ain ka Jylla ka ban long ha ka 24 Nailar haduh 28 tarik Nailar, ha kaba ka Liang Pyrshha kan ioh ia ka lad ban kren ia kine ki ishu lyngba ka jingiatai, jingbuh jingkylli bad ki motion hapoh ka Iingdorbar.
Shuwa kane ka jingiaid paidbah, u Myntri Rangbah Conrad K Sangma ula buh jingkylli ia ka jingdonkam ban hap mih iakhih sha surok haba ka Dorbar Synrai jong ka Iingdorbar Thaw Ain kan sa long shen. Ula ban jur ba ka Sorkar ka long kaba kloi ban iakren bad ong ba ka Iingdorbar Thaw Ain ka dei ka rynsan synshar paidbah ia ki nongmihkhmat paidbah ba kin iakren ia kum kine ki mat.
Kaei kaba sammut ka long ba u MDC ka VPP bad Executive Member Bah Powell Sohkhlet ha ka sngi Palei, ula ialam paidbah ban pyrta slogan “Down Down” ia baroh ki seng sain pyrthei kynthup ia ka NPP, BJP, UDP bad HSPDP hynrei ha ka jingshongshit la kynthup lang ia ka VPP, ka party ba u mihkhmat.
 ha ka sngi Palei kala mih sha surok ryngkat ki spah ngut ki nongkyr shan ban iatur paidbah sha Meghalaya Secretariat na ka bynta ban pynbor ia ka Sorkar Jylla ba kan shimkhia ia ki 10 tylli ki mat kaba ka ong ba ki dei ki ishu u paidbah.){kind=link}