Kat bym pat pynbha ia ka surok Nongpoh-Umden-Sonapur
Shillong, Jylliew 06 : Kawei ka Longkmie na Ri-Bhoi kala tur leit shah thngan hynne ka sngi Palei hakhmat ka khyrdop ka Secretariat bad byrngem ban shong shah jingit haban da iap katba ka Sorkar kam pat shna ia ka surok Nongpoh-Umden-Sonapur.
Kane ka Longkmie ka kyrteng ka kong Bindas Syiem kaba dei naka thain Umden
Kane ka Longkmie kala wan kiew hynne ka step sha Shillong ha ryngkat ka placard ban shong shah jingit hakhmat ka Secretariat.
Kat kum kane ka placard, kane ka longkmie kala ong “Nga ka Bindas Syiem nga wan ban dawa ia ka hok u paidbah na ka bynta ka surok Nongpoh-Umden-Sonapur katba ka Sorkar kam pat ai ngan shong shah thngan haban da iap hakhmat ka Secretariat”.
Lah ban kdew hangne, ki Nongshongshnong ka thain Umden, kynthup ki Sengbhalang bapher bapher bad ki Synjuk ki Rangbah Shnong, na ka por sha ka por, kila dawa ia ka Sorkar Jylla ban shna pynbha noh ia ka surok Nongpoh-Umden-Sonapur namar ka jingjot rathai.
Kane ka surok ka dei kaba la shu ieh lah bun bun snem, kaba la pynsyllang shikatdei eh ia ki paidbah ha ka leit ka wan khamtam ha ka kit ka bah bad kiba pang ba shitom.
Ka kong Bindas Syiem kaba don laingut ki Khun, kala pynpaw ba kala shim ia kane ka sienjam namar ka jingngiah jingkdang ia ki jingkular thok ha ka por elekshon.
“Kito kiba jop bad ba rem ha ka elekshon kila kular ban ia ngi ia kane ka surok hynrei ka paw pynban ba ka dei tang ka kam thok. Namar kata, nga la sngiah khamtam na shimet ruh nga la mad ia shibun ki jingeh namar ka jinglong jong kane ka surok. Kumta, nga dei ba nga don ia ka hok ban dawa ia ka surok kaba bha” kala ong haba iakren bad ki nongthoh khubor.
Ka Kong Bindas kala pyntip ba kala dep iakynduh ia u Executive Engineer ka PWD (Roads) bad dep thoh ruh sha u Deputy Commissioner halor kane ka kam hynrei “Ngam sngewhun ia ka jubab ba ki ai”.
Haba kylli, kane ka Longkmie kala ong ba kam dei satia ka kamram jong ka ban iakynduh ia u Symbud Myntri Rangbah ba dei khmih ia ka Tnad PWD (Roads) ban ioh jingshai halor ka jinglong jingman kane ka surok.
“Nga la kut jingmut ban iaid beit shakhmat bad kane ka jingiakhih. Ngan ym mih nangne katba ka Sorkar kam pat long ba khreh ban ai sha ngi ia ka surok ba bha” kala ong/
Kat kum ka jingong jong ka, kam don jingmut satia ban pan ia ka jingkyrshan na kiwei pat ki briew ha ka jingialeh ban ioh ia ka surok bha.
