Shillong, Jymmang 05 : Ka Iingkashari Meghalaya High Court, kala bthah ia ka Sorkar Jylla bad ia ka Meghalaya Energy Corporation Limited (MeECL) ba kin file ia ki affidavit la la ka jong haba iadei bad ka jingpynlip bording ba khlem sangeh hapoh ka Jylla.
“Ka Sorkar Jylla bad ka MeECL kin file affidavit la la ka jong ban pynpaw ia ki sienjam ba mardor, ba shipor bad ba bun snem bad ban batai ia ka jingdawa bording bad ka plan ban leh ha ka por ka jingkhangdam ba kynsan kynsan jong ki Power Plant bad kiwei ki tyllong ba lah ban ioh bording” ong ka Division Bench bala khlieh da u Chief Justice Sanjib Banerjee bad Justice W Diengdoh ha ka hukum bala pynmih hadien ba bishar ia ka PIL bala mudui da u Flaming B Marak hynne ka sngi Thohdieng.
“Ia kine ki affidavit dei ban file hapoh ka artaiew naduh kane ka sngi. Kine ki affidavit ki dei ruh ban kdew ia ka bhah kynta ba kumjuh ha ka jingpynlip bording bad kiwei kiwei ki jingpynbeit bala pynkhreh ban pynioh bording na ka bynta ki jingshakri bym lah kiar kum ki hospital, kad liengsuin bad kiwei ki kor treikam (Installation) ba kongsan” kala ong.
Pule lang ia kane: Shimpor 3 snem ban pynwandur ia ka Mining Plan ka Meghalaya, ong u CM halor ka jingioh tih dewiong biang
U Nongmudui ula ujor pyrshah ia ka jingpynlip bording pathar hapoh ka Jylla bad ka jingpynlip bording hala ka mon da ki Heh ka Tnad.
Kaba phyla ka long ba wat hapdeng ka jingai jingthoh ia kane ka hukum, ka bording hapoh ka iingkashari kala lip,ong ka Iingkashari haba bynrap ba ka bording kala meh noh tang da ki katto katne second hynrei ka lah ban dei ka dak ba ka Sorkar kan hap ban ai ia ka jubab kaba biang.
Haba pynpaw ba ka bording elektrik kam dei shuh ka mar remdor ban pyni ia ka jingdon spah(luxury), ka Iingkashari kala ong ba ka dei ka kamram jong ka Sorkar Jylla ban pynthikna ba dei ban pynioh pahuh ia ka bording kat kum ka jingdawa bording bad ka dei ban don ia ka plan ha ka ban pyndap ia ka jingdawa ka ban dang kiew hadien habud.
“Ha ka jingshisha, ka Jylla ka lah ban thied ia ka bording na ki Grid ba laitluid bad ban iapynbeit bad ki kompani pynmih bording, ia kaba bun ki treikam hapoh ka thain Shatei Lam Mihngi, ban pynthikna ba ki Nongshongshnong kin ioh pahuh ia ka bording, kaban shong pat ha ka bor kaban hap siew da ki nongshongshnong” kala ban.
Ha kane ka jingbishar, la pynpaw hakhmat ka Iingkashari ha ka jaka jong u Chairman ka Meghalaya Energy Corporation Limited, ba ka jingdawa bording ha ka shibnai kala kot sha ka 200 million unit bad ka jingdon bording ha Jylla ka long tang 88 million unit.
Kat kum ka jingong ka MeeCL, kane ka jingduna bording ka dei namar ka jingkhang dam ia ka Power Plant ha Tripura na ki daw ka jingsniew ki machine bad ka Sorkar Jylla kam lap satia ia kiwei pat ki tyllong ban thied bording.
Ka Iingkashari kala buh ban bishar biang ia kane ka kam ha ka 30 tarik u Jymmang.
Pule lang ia kane: Iasyllok ka Tnad Pulit bad ki Hotel ban pyndait ia ki kor CCTV
