Shillong, Naiwieng 12: ka Shillong Archdiocese ka la pynlong ia ka Eucharistic Procession ba shisien shisnem ha ka sngi u Blei ha Cathedral of Mary Help of Christians Laitumkhrah. Ia kane ka jingleh niam la sdang da ka jingduwai bad ka knia mass bakhuid ha ka por mynstep .
Ia ka jingiaid procession mynta u snem ka la sdang na Calvary bad ki riewngeit kila la iaid sha Dhankheti, surok Shillong-Jowai, Laitumkhrah Main Road, Don Bosco Square, bad pynkut biang ha Calvary.
Daki phew hajar ngut ki riewngeit Catholic kila wan ban shim bynta ha kane ka Eucharistic Procession kaba la ju pynlong daka ingmane Catholic Church ban wanrah ka jingiatylli.
Lah ban kdew ba ka kane ka Eucharistic Procession la pynlong ha baroh kawei ka pyrthei iaka ba la tip kum ka ‘Corpus Christi’ lane ka met u Jisu haka ktien Latin.
Ia kane ka Eucharistic Procession la pynlong nyngkong daka ingmane Catholic ha u snem 1247 ha Belgium bad katba iaid ki spah snem kane ka jingiaid ki riew ngeit kala kylla long ka rukom ha kylleng ka syttlak pyrthei.
