Shillong Nailar 26: Ki paidbah na kylleng ka jylla Meghalaya kila iatuid lut sha JN Stadium Polo, Shillong ban sakhi ia ka jingiakhun hapdeng ka Shillong Lajong FC pyrshah ia ka Northeast United FC ha ka Semi Final kaba nyngkong jongka 133rd Durand Cup 2024.
Naduh ka por mynsngi ki paidbah kiba la dep thied tiket lyngba ka Online bad Offline kila ieng ban ioh rung kloi sha Jawaharlal Nehru Stadium.
La sakhi ruh ba ki briew ki bym pat ioh ia ki tiket kila pyrshang ban wad ia ki lad ki lynti ban ioh thied tiket hynrei kiba bun hi kila pynpaw ba lada kim ioh tiket kin leit ban peit noh ia katei ka jingiakhun ha ki Fan Park kaba la pynkhreh ban peitkai na ka bynta kito ki bym ioh tiket.
la sakhi ruh ba bun ki briew kila ialum ruh ban thied ia ki jersey jong ka Shillong Lajong bad kala don ruh ka jingiaknieh ban thied ia ki jersey.
Kiba bun hi ki nongkyrshan kiba rung shapoh madan kidei kiba iashah bad kyrshan ia ka Lajong bad kila don ruh kiba kyrshan ia ka North East United FC.
Ka jingtuid u paidbah ban leit sakhi ia kane ka jing iakhun kadei namar ba kadei ka sien kaba nyngkong eh ban pynlong ia ka Semi Final jong ka Durand Cup ha nongbah Shillong bad khamtam haba ka jingiakhun kan long hapdeng ka Shillong Lajong pyrshah ia ka North East United FC.
La sakhi ruh ba ki nongpeitkai mar ia iohi ia ki rangialehkai ba ki rung ban praktis kila ia risa bad kila shad kmen ruh haba la tem ia ka jingrwai Waka Waka bad kiwei kiwei ki jingrwai kiba iadei bad ka football.
Ia ka Durand Cup, la pynlong nyngkong eh ha u snem 1888, kadei ka jingiakob ialehkai kaba rim tam ha ka dewbah Asia bad kaba 5 ha ka pyrthei kum ka jingiakob ialehkai kaba la rim tam.
Kumba long mynta ki paidbah kila shong ha ki jaka shong ki jongki bad ki ap khmih lynti ba ka jingiakhun kan sdang noh..
