Tuid ka jingpdiang burom ia ki Champion ka Subroto International Cup ka skul na Ri-Bhoi

Yn ai sngewbha u Myntri kam ialehkai da ka Madan Basketball

Nongpoh, Nailar 30 : Ka kynhun ialehkai U-15 jong ka Nongjri Presbyterian Secondary School, Ri-Bhoi, kala wan phai sha la iing kum ka kynhun ki ‘Hero’ da ka jinglah ban khur ia ka nam Champion (namtam) jong ka Subroto International Cup kaba 63.

Ia kane ka kynhun la pdiang burom ha Kad Liengsuin, Guwahati hynne ka sngi Thohdieng, da ki Heh Ophisar ka Tnad Sports ka Jylla ha ryngkat u MLA ka Mawhati Bah Charles Marngar uba dei ruh u President jong ka Managing Committee ka skul Nongjri Presbyterian Secondary School bad ki bahaiing hasem kiba la synran ia ka kynhun haduh ha madan Nongjri.

Kane ka kynhun kala ioh ruh ia ka jingpdiang burom na ki bor pyniaid District ka Ri-Bhoi, ka Ophis u District Sports Officer bad ka Khasi Students Union ha Indoor Stadium, Umlungkdait, Nongpoh hashuwa ba ka kynhun kan leit sha ka Ophis ka Ri-Bhoi District Sports Association kaba la pdiang burom ia ki.

Nangne, kine ki kynhun bapher bapher kila synran ia kane ka kynhun ialehkai ban iaid paidbah haduh ban da poi ha madan Nongjri.

U Myntri kam ialehkai ka Jylla Bah Shakliar Warjri ula leit ban ai khublei marmet ia kane ka kynhun ha ka jingialang pynkup burom kaba la pynlong ha madan Nongjri, kaba la wan iashimbynta da u MLA ka Nongpoh Bah Mayralborn Syiem, u Director ka Tnad Sports DD Shira bad kiwei kiwei.

U Myntri haba ai jingkren, ula ai khublei kyrteng ia ki bor pyniaid jong ka Nongjri Presbyterian Secondary School kiba la kyrshan dohiap ia ka kynhun naduh ba sdang ka Subroto Cup naduh ka District level, State lebel haduh ban da poi ka thong ban lah ka namtam jong ka International Subroto Cup.

Kum ka jingai mynsiem ia ki bor pyniaid ka skul ba kan nang lah ban sei ia ki rang bad ki thei ialehkai bad ban nang kyntiew ia ka pule ka dangle, u Myntri ula kular syndon ban pynioh ia kane ka skul da ka madan ialehkai basketball kaba paka.

U Myntri ula kular ban sa pynioh noh shen ia kane ka madan ialehkai kum ka jingpynkup burom bad ai mynsiem ia ki bor pyniaid skul bad ia ki khynnah skul ruh kumjuh.