Tripura, Nailur 11: Ka Bharatiya Janata Party (BJP), Tripura kala rai ban rakhe ia ka sngi kha u Myntri Rangbah Duh ka Ri Narendra Modi kum ka Namo Vikas Utsav bad kan pynlong ia ki prokram bapher bapher ha kane ka sngi.
Namar kane ka jingrakhe ia ka sngi Kha u Myntri Rangbah Duh ka ban long la 17 tarik Nailur, ka BJP Tripura kala rai ruh ban pynjur bha ia ka jingiaid ialap elekshon sha ka elekshon Lok Sabha ka ban long ha u snem u ban wan.
Ka Tripura kaba ka BJP kala ioh jingjop haduh ar samoi lynter mynta u snem, kala sdang ban pynjur ia ka jingiaid ialap ban jop biang ia ka elekshon Lok Sabha.
U MLA ka BJP Bhagaban Das ula ong “Ngi kwah ban pyni ia ka jingieid kaba ki paidbah ka Tripura ki don ia u Modi, kaba ngi baroh ngi kwah ba un dang bam smai biang kum u PM ha ka sien kaba lai. Ka BJP kan pynjur bha ia ka elekshon Lok Sabha da kane ka jingrakhe”.
U Das ula pyntip ba ha ka 17 tarik Nailur, ka jingrakhe kan sdang da ka jingialeh yoga ha Madan ka PWD ha Kumarghat ka ban wan iashimbynta da u Myntri Rangbah ka Jylla Manik Saha, ki Myntri Sorkar bad ki Nongialam ka party na Delhi bad Tripura.
Ula pyntip “Da ka jingdap 73 snem u PM ha ka 17 tarik Nailur, haduh 73 tylli ki Longiing kin ioh ia ki PG ration card, katba 73 sla jong ka Bhagavad Gita yn sam sha ki samla pule bad 73 ngut ki briew ba duna dkhot met kin ioh ia ki tiar iarai ha kane ka sngi”.
