Agartala, Iaiong 27 : Ia ka iew khappud ne ka ‘Border Haat’ ha Srinagar kaba don shathie ka district ka Tripura yn sa plie noh ha ka 9 tarik u Jymmang u ban wan hadien ar snem ba la khang khyrdep namar ka jingsaphriang jong ka jingpang Covid-19.
Ia kane ka rai la pynbna ha ka jingialang jong ka joint Border Haat management committee, ba la wan iashim bynta da ki heh sorkar napoh South District Tripura bad na Feni district jong ka Bangladesh.
Ka committee ka la shim ia ka rai ban shah ia kumba 2400 ngut ki nongthied, kata mar 1200 spah na baroh arliang ba kin wan jngoh ia kine ki jaka iew man ka sngi, bad 54 ki nongdie na baroh arliang jong ka India bad Bangladesh kin ioh ia ka lad ban die ia ki mar ki mata ki jong ki.
Na ka liang ki heh sorkar jong kine ki artylli ki ri ki la iamir jingmut ruh halor ki lad ki lynti ban kyntiew ha ka ba iadei bad ka jingdon jong ki nongdie, bad ha kajuh ka por ki la mynjur ruh ha kaba iadei bad ka jingshna ia ki jaka leit shabar na ka bynta ki kynthei.
Kane ka jingplie ia kane ka jaka iew khappud ha Srinagar ym tang ba kasn kyntiew ha ka liang ka khaii ka pateng, hynrei kan kyntiew ruh ia ka jingiadei hapdeng ki nongshong shnong jong kine ki artylli ki ri ba marjan.
Pule lang ia kane: Dawa ka KSU ban weng noh ia ki shipai BSF na shnong Amlarem
