Agartala, Lber 17 : Uwei u Nong Bangladesh ula iap hadien bad uwei ula mynsaw ha ka jingther kuli ki shipai BSF katba ki dang iakhaii tuh ha khappud ka Unakoti District, Tripura hynne ka sngi U Blei.
Ki shipai BSF kila kem ruh ia lai ngut ki nong Myanmar na Agartala Railway Station ha ka sngi U Blei hadien ba kine ki nong Myanmar kila wan rung sha Tripura na Hyderabad ban leit sha Bangladesh.
Ki shipai BSF ki pyntip ba katba ka kynhun ki shipai ki dang iaid pahara ha ka thain Magroli Border Outpost, kila lap ia kumba 15 haduh 20 ngut ki nongkhaii tuh kiba wan kiew na Bangladesh sha u pud u sam ka India katba kumba 25-30 ngut ki riew runar na Bangladesh kila kit ia ki mar khaii tuh.
Ki BSF kila ialeh ban bat ia ki hynrei kine ki briew kim shym la pynsnagp bad pyrshang pynban ban ker kut ia ki shipai, shoh ia uwei u shipai bad knieh ruh ia ki tiar siat. La ong ba kine ki nong Bangladesh kila thmu ban kit ia une u shipai sha Bangladesh.
Haba iohi ia ka jingma, ki shipai BSF kila ther kuli ia kine ki nong Bangladesh bad ha kane ka jingjia, uwei u nongkhaii tuh ula iap hashen bad une u kyrteng u Saddam Hussein ba 23 snem, uba dei na Moulovibazar District katba uba mynsaw pat la pynkit noh da kine ki nongkhaii tuh sha Bangladesh.
Ha kane ka jingjia, uwei u shipai BSF ula mynsaw jur na ki bynta jong ka shyllang bad la pynkit mar mar ia u sha ka District Hospital ban ioh ia ka jingsumar.
Ha kajuh ka por, la pyntip ba ka Anti Human Trafficking Unit jong ki BSF kila pynlong ia ka jingkhynra ryngkat ka Railway Protection Force (RPF) bad ka Government Railway Police (GRP) hynne ka sngi bad ioh bat ia 3 ngut ki Rohingyas na Agartala railway station.
Kine ki laingut ki kyrteng u Hamid hussain (23), Abdur Rasik (24) bad Mohammed Yusuf.
