Agartala, Nailar 05: Ki ehrang kaikhlaw jong ki kynhun bapher bapher, kiba la pyndem wait hynne ka sngi nyngkong, ki la sdang ïa ka jingshah thngan kaba 48 kynta ban kyrshan ïa ki jingdawa bapher bapher kynthup ki song jingiarap ba ki dei ban ioh.
La sakhi palat 300 ngut ki ehrang bala pyndem wait, ki la wan pyndem wait ki la iashim bynta ha ka jingshah thngan.
Kine ki ehrang haka 31 tarik Naitung, ki la pyntip sha u Myntri Rangbah ka Tripura u Manik Saha halor ka jingiakhih jong ki.
Kumba 300 ngut ki ehrang kaikhlaw kiba la pyndem wait kiba dei na ki kynhun lehnoh bapher bapher ba kynthup ïa ka National Liberation Front of Tripura (NLFT), ka All Tripura Tiger Force (ATTF) bad ka Bru National Council of Tripura (BNCT) ki la sdang ïa ka jingïakhih daka ba shah thngan kaba la neh haduh 48 kynta ha ka thaiñ Manu-Manpui ha Kanchanpur jong ka thain shathie ka Tripura.
Haba kren sha ki nongthoh khubor, u nongaiktien jong ka kynhun ba iakhih, u S.K. U Jamatia u la ong ba ha ki bynta bapher bapher, haduh 1235 ngut ki lehnoh jong ka NLFT, ATTF bad BNCT ki la pyndem wait haduh u snem 2018 hynrei ka sorkar ka dang ban pyntrei ia ki 5 tylli ki mat jingdawa, kiba kynthup ia ka jingpyn iohkam iohjam ia baroh ki dkhot ba la pyndem, ka jingweng noh ia ki mukotduma kiba dang sahteng pyrshah ia ki, ka roi ka par jong ki jaka jong ki bad kiwei kiwei.
“Lada ka Sorkar Jylla kam pyntreikam kloi ia ki jingdawa jong ngi, ngin sa iakren biang para ma ngi ban pynlong ia ki jingiakhih kiba kham heh ban pynpaw ia ki jingdawa jong ngi kiba la ap slem bha,” la ong u Jamatia.
