Agartala, Rymphang 04: Ban pynneh ia ka bor synshar ha Tripura, ka BJP ka la pyndonkam ia baroh ki buit ki bor bad sdang ruh ban pynlong da ka jingleit ialap sha man la ki thliew iing briew khnang ban ioh ban khring vote shwa ka ilekshon ka ban long ha ka 16 tarik mynta u bnai.
Ha kane ka sngi Palei ba la lah, u CM ka Tripura u Manik Saha la iohi ba ula bunkam ha kaba leit rung iingbriew ha ka nongbah Agartala.
U Saha u la pynlong ka jingleit ialap ilekshon sha man la ki thliew iing mynta la bun bun sngi da kaba rah ruh ia ka khubor jong ka sorkar sha ki paidbah.
Haba kren sha ki lad pathai khubor ha kane ka jingleit ialap ilekshon, u Saha u la ong; “Shibun bah ki projek bad ki skhim ka sorkar pdeng la pyntreikam ha kane ka jylla na ka bynta ki jingmyntoi jong u paidbah.Ki nongshong shnong ki la ioh pdiang ia ki jingmyntoi lyngba kine ki skhim bad ngi kyrmen skhem ba kin ai ka jingkyrshan kaba pura ia ka seng BJP sa shisien pat.”
U national president ka BJP u JP Nadda ruh u la wan ban iashim bynta ha ka jingialap ilekshon ha Tripura ha ka sngi Thohdieng ba la lah shwa ban leit sha ka jingiathep vote.
Kane ka party ka lah ruh ban pyllait ia ka mat ialap ilekshon jong ka na ka bynta ka Tripura ha une u taiew u ban wan.
Ka Seng BJP ka la pynkhyllem noh ia ka jingsynshar kaba 25 snem jong ki party left ha Tripura ha ka ilekshon assembly 2018 bad thaw ia ka sorkar ha ryngkat ka party IPFT ha ka jylla.
