Guwahati, Rymphang 04: U Myntri Rangbah (CM) ka Assam u Himanta Biswa Sarma mynta ka sngi Saitjain u la ong ba haduh 2211 ngut ki briew ki la shah kem noh haduh mynta halor ka jingdonkti ha kaba iadei bad ki kam pyniathoh shongkurim khynnah (child marriage) ha ka jylla.
Haba kren sha ki lad pathai khubor mynta ka sngi, u Himanta Biswa Sarma u la ong, “Ka jingkhynra halor ki kam pyniathoh shongkurim khynnah kan dang iai bteng haduh ka ilekshon assembly ka ban long ha ka snem 2026.Kito kiba don bynta ha kane ka kam beain kin ngat ha ka jingshah pynshitom kaba tyngeh.”
“Ki kyndon ain ki long kiba iapher.Na ka bynta kito kiba pyniathoh ia kiba dang hapoh ka rta 14 snem, ki kyndon ki long ba kin ym ioh jamin bad ia kiba palat 14 snem ki lah ban ioh jamin.Ngi la lapdien ia kumba 8100 ngut ki briew ki ba don bynta ha ki kam pyniathoh shongkurim khynnah.Hadien kane ka jingkem ia kine ki briew kiba donkti, yn pynlong ruh ia ki jingpynshai paidbah halor kane ka kam beain hapoh ka imlang ka sahlang,” ong shuh shuh u Sarma.
Nalor kata u la ong ruh; “Hashwa ka ilekshon assembly 2026, ka jingkhynra halor ki kam pyniathoh shongkurim khynnah kan dang iai bteng, bad hapoh Assam la khang pyrshah ia kino kino ki kam pyniathoh shongkurim khynnah.Ka jingpyntreikamkam ia kane ka sienjam kan long kaba neh khnang ban khanglad ia kane ka kam beain.”
Ka jingioh kem ia kiba don bynta ha kane ka kam beain ka kham jur bha ha Biswanath, Dhubri, Barpeta, Kokrajhar bad Hojai.
Kane ka jingkem ia kiba donkti ka la wan long ruh hadien ba u CM Sarma u la pynbna ba ka sorkar jong u kan shim ia ki sienjam kiba pyrkhing ban khanglad ia ki kam pyniathoh shongkurim khynnah ha ka jylla.
U Sarma u la ong ruh ba kito ki shynrang kiba iathoh shongkurim ia ki kynthei kiba dang hapoh ka 14 snem rta kin shah pynngat ha ka ain Protection of Children from Sexual Offences (POCSO) Act, bad yn pynngat hapoh ki kyndon ain rohibition of Child Marriage Act, 2006 pyrshah ia kito kiba pyniathoh shongkurim ia ki kynthei kiba hapdeng ka rta 14 haduh 18 snem.
