Agartala, Jylliew 13: Ka Sorkar Tripura ha ryngkat bad ki nongialam jong ka Bharatiya Janata Party (BJP) ki la pynrem jur ia ka jingthombor jong ki paidbhur dang shen ia ka iing barim jong u Rabindranath Tagore uba la ioh ia ka khusnam Nobel Laureate, kaba don ha Shahjadpur, Sirajganj district ka Ri Bangladesh.
Katei ka jingjia, ka la jia ha ka 8 tarik Jylliew ha kaba ki paidbhur ki la pynjulor ia ki bynta jong ka Rabindra Kachari Bari, kaba dei ruh ka Museum bad kane ka jingshah pynjulor kadei namar ka jingiakajia hapdeng uwei u nongwan jngohkai bad uwei u nongtrei, halor ka bai ieng kali.
Ki paidbhur ki la pynpra ïa ka Auditorium, ki la pynpra ïa ki jingkhang iit, ki shuki bad kika ktha kti ia u Director jong ka Museum kaba la pynmih ïa ka jingbitar ha kylleng ka ri India bad Bangladesh.
U Myntri Rangbah ka Jylla Tripura u Dr. Manik Saha ula khot ia katei ka jingshah thombor, “ka kam kaba pynjah burom ia ka jaitbynriew” bad ula dawa ruh ia ka jingpynshitom kaban long ka nuksa ia ki nongleh kam sniew.
“Kane ka jingjia ka long kaba dei ban pynrem jur. U Rabindranath Tagore, u myllung ba pawnam ha ka pyrthei bad u nongthaw ïa ki jingrwai ri India bad Bangladesh, u dei ka dak jong ka pateng tynrai jong ngi” u la ong.
U MP ka Rajya Sabha ka Tripura uba dei ruh u Myntri Rangbah barim ka jylla u Biplab Kumar Deb ruh u la pynrem jur ïa kane ka kam bad dawa ban leh mardor ban pynngat kyndon ïa ki nong donkti ban pynjulor iaka jingshah u Rabindranath Tagore.
Ka tnat Ministry of External Affairs (MEA) ka la pynrem jur da kaba ong ba katei ka kam ka dei shi bynta jong ka jinglong kaba pynkulmar jingmut jong ka jingshah thombor ha ki dak jong ka jinglong ba bun jait bad ka jingïaishah ha Bangladesh.
“Ngi pynrem jur ïa ka jingshah thombor bad shah pynjot beiñ ïa ka ïing longshuwa jong u Gurudev Rabindranath Tagore da ki paidbhur,” ong u nongaiktien ka MEA u Randhir Jaiswal.
“Ka jingleh donbor ka long ka jingpynjah burom ïa ka jingkynmaw bad ïa ka jingmut jingpyrkhat bad ki jinghikai kiba kynthup lang ïa baroh kiba u nongïoh khusnam Nobel u la kyrshan ha Bangladesh,” u la bynrap, da kaba kyntu ïa ka Sorkar ba shipor ha Dhaka ban “pynshitom ïa ki riew leh donbor bad ban shim khia da kaba tyngeh ban khanglad ïa kum kine ki jingjia.”
Ia u Rabindranath Tagore la kha ha Kolkata, u la pynlut bun ka por ha Sirajganj, ha kaba u la thoh shibun ki kot thoh kot ba pawnam jong u. Naduh kata ka por kane ka jaka ka la kylla long ka jaka pyni ia ka kolshor, kaba khring ia ki nongwan jngohkai na baroh ar tylli ki ri.
Ka Myntri Rangbah ka West Bengal, ka Mamata Banerjee, ka la ban jur iaka jingdonkam ban tuklar kyrkieh da ki bor synshar.
Ha ka shithi sha u Myntri Rangbahduh ka ri u Modi, ka la ong “Ka jingpynjot kaba pynkyndit ia ka iing ki kpa tymmen jong u Kobiguru ka dei ka kam leh beain. Kam dei tang ka jingshah thombor ha kawei ka jingtei, hynrei ha ki jingmut bad ka jingiatylli ha ka kolshor kaba u Tagore u pyni. Ka Bengal kan ym shah ia kano kano ka jingshah lehbein ki jingsah jingkynmaw ki riewkhraw ha kano kano ka jaka ha ka pyrthei.”
Ka Mamata Banerjee ka la kyntu ia ka New Delhi ban sdang “ka jingiatreilang mardor bad kaba khlain” bad ka Dhaka bad ban pynthikna ia ka jingiada ia baroh ki jaka kiba donkam ha ka kolshor bad ka histori.
 ki la pynrem jur ia ka jingthombor jong ki paidbhur dang shen ia ka iing barim jong u Rabindranath Tagore uba la ioh ia ka khusnam Nobel Laureate, kaba don ha Shahjadpur, Sirajganj district ka Ri Bangladesh.){kind=link}