Agartala, Nailur 23: Ka seng Congress hynne ka sngi ka la pynlong ia ka jingiakhih hakhmat ka Police Headquarter Tripura ban pyrshah ia ka jingbym treikam ka ain bad ka jingshah ktah ka shong suk shong shngain hapoh ka Jylla.
Ka Congress kaba don ha ka Liang Pyrshah, ka dawa ban leh da kaba tyngeh ia ki nongleh kam sniew kiba donkti ha ki kam runar kynthup ia ka jingpyniap briew.
Ki nongialam ka Congress ki la byrngem ruh ban pynlong ia ka jingiakhih da ka ba kerkut iaki Thanat lane ‘thana gherao’ ha kine ki sngi ban wan lada ka Sorkar bad ki pulit kim shimkhia ia ka suk ka sain.
Palat hajar ngut ki nongialam ka Congress, naduh ki dkhot, ki nongtrei kynthup ia ki kynthei, ki la iashim bynta ha jingiaid paidbah bad ki la pynlong ia ki jingiakhih daka ba shong ha khmat ka Police Headquarter ha Tripura.
Hynriew ngut ki Nongialam ka kynhun Congress ha ka jingialam da u President, u Asish Kumar Saha, ki la iakynduh ia u Director General of Police (DGP)Amitabha Ranjan bad pyntip ia u halor ka jingkiew ki kam runar pyrshah ia ki kynthei, ki khynnah, ki briew kiba lui lui, nalor ki dkhot bad ki nongkyrshan jong ka Party.
Haba kren sha ki lad pathai khubor, u Ashish Kumar Saha u la ong, “Ki don ki jingshah bom shah tied ki briew ba lui lui, ka jingshah thombor ki kynthei, ka jingshah thombor ki riew paidbah bad ki nongkyrshan jong ka Party. Ym shym la shah ia ki nongthep vote ban pyndonkam ia ka hok jong ki ha ka ilekshon Panchayat kaba dang shen. Bun ki kyrtong jong ka Party kim shym la shah ban iakhun bad kito kiba iakhun ki la hap ban mad ia ka jingshah pynshitom bein kaba shyrkhei. Ki briew ki la duh jingshaniah ha ka Sorkar bad ka bor Pulit,”.
“Ngi la ong ia u DGP ban pynthikna ba yn leh da kaba tyngeh ia ki nongleh kam sniew, ki nongpyniap briew, ki nongleh beijot bad ban pynneh ia ka shong suk shong shngain, lym kumta ngin sa pynlong ia ka jingiakhih ha baroh kawei ka Jylla” la ong u Saha.
U nongialam ka seng Congress u la kynnoh ba ki Pulit ka Jylla kila kylla ki niangkohnguh hapoh ka jingsynshar jong ka BJP.
