Agartala, Jymmang 12: U Chairman ka Indian Space Research Organisation u V. Narayanan ha ka sngi u Blei ula ban jur ia ka jingkongsan jong ki bor treikam ki kor satellite ban pyntikna ia ka jingshngain jong ka ri bad kumjuh ruh ban shakri ia ki jingdonkam jong ki paidbah.
U Chairman ka ISRO u la pynpaw ia kane haba ai jingkren ha ka 5th Convocation jong ka Central Agricultural University (CAU), ha kaba u la ong, ba 10 tylli ki satellite ki treikam baroh shisngi na ka bynta ki jingthmu ba kongsan ban iada ia ka ri bad ruh ia ki nongshong shnong jong ka.
“Ban pyntikna ia ka shngain jong ka ri, ngi donkam ia ka jingshakri lyngba ki satellites bad kumba ngi donkam ban peit bniah ban buddien kumba 7,000 km ha rud duriaw bad khlem ki satellite bad ki drone katkum ka juk technology, shibun ki jingjop ngin ym lah ban poi ne kot” ong u Narayanan.
U Narayanan u la kdew ba ka jingshna ia ki satellite jong ka ISRO ki kyrshan ym tang ban ai ka jingïada hynrei ki kyrshan ruh ïa ki jingshakri paidbah kiba kongsan kynthup ïa ka rep ka riang, ka jingpynbna telebishon, ka jingïathuh lypa ïa ka jinglong jingman jong ka suiñbneng, ka jingpeit bniah ïa ka mariang nalor kiwei pat.
Haba pynpaw halor ka jingiarap bha na ka jingtrei kam jong ki satellites u Narayanan u la pynpaw ba ki jingjia ba mynsaw ne ki jingjia ba sngewsih kila hiar bha haba don ka jingshah lyngshop ha ki bor jong ka mariang namar ba la ioh jingtip kloi lyngba ki satellite data kiba la ai lypa ka jingmaham.
Shuh shuh u la pynpaw ruh ka jingsngew sarong ba ka ri India ka don ha ka kyrdan ba nyngkong ha ka pyrthei ha ki hynniew tylli ki bynta jong ka science bad technology. Haba pynkynmaw ia ki mawjam jong ka ISRO, u la kdew ia ka Chandrayaan-1 mission, kaba dei kaba nyngkong eh ban lap ia ki sakhi sabut jong ki molecule ha u Bnai.
Ka India, katkum u Narayanan, kala pyllait paidbah haduh 433 satellites na ka bynta ki 34 tylli ki ri bad bynrap ruh ba ka India kala shna Satellites na ka bynta ka G-20 ban buddien ia ka jingkylla ka mariang.
Ha kawei ka jingjia kaba kongsan, u Narayanan u la pynbna ba ka India bad ka US kin ïatreilang ban shna ïa u satellite uba rem dor tam ha ka pyrthei uba lah ban ring dur ïa ka pyrthei, ïa uba yn sa pyllait paidbah na India.
