Agartala, K’lyngkot 16: Phra ngut ki ehrang ka kynhun kiengatiar National Liberation Front of Tripura (NLFT) kila wan ban pyndem wait ha ka sngi Nyngkong hakhmat ki bor pahara ha Tripura.
Kat kum ka khubor, kine ki ehrang NLFT ki dei kiba phet tuh na ktem jong ka kynhun kaba don ha Bangladesh.
Kine ki ehrang ki kyrteng u Netajoy Reang (33), Mohonda Reang (36), Sukumar Reang (27), Kiranjit Reang (20) bad u Bishnuram Reang (26).
“Ngi la ioh kurup ia ka pistol China, 2 tylli ki rifle China, 17 tylli ki kuli, 10 tylli ki kuli shotgun, kawei ka walkie talkie, ka pisa Bangladesh ba 770 taka, artylli ki mobile sim card ka Bangladesh bad katto katne ki kot ki slab a donkam” ong ki Heh Pulit.
Ha kawei pat ka jingjia, sa 3 ngut ki ehrang ka NLFT kila wan ban pyndem wait hakhmat ki shipai BSF ha Dhalai District ka Tripura.
Ki bor pahara bad ki kynhun Syntiat kila pynlong ia ka jingtohkit ia kine ki ehrang ba wan pyndem wait.
