Tripura | Nang pur ka jingiapher jingmut ha ka NDA ba kynnoh kyntur pud ka TIPRA ia ki jaka ADC

Agartala, Rymphang 6: Ka jingkhih phalok ka sain pyrthei hapoh ka kynhun National Democratic Alliance (NDA) kala paw pyrthei hadien ba ka TIPRA Motha kaba don lang ha ka kynhun, kala kynnoh ba ka sorkar jylla ba la ïalam da ka BJP ka la pynrung beaiñ ïa ki jaka ba la pynbna thymmai hapoh ka Bishramganj Nagar Panchayat, kaba la pynmih ïa ka jingïakynad kaba jur tang ar bnai shwa ka TTAADC elections.

Haba niew ïa kane ka sienjam kum ka “jingwan kyntur pud” ïa ki bor synshar jong ka Tripura Tribal Areas Autonomous District Council (TTAADC),u heh ka TIPRA Motha u Pradyot Kishore Debbarma ha ka sngi Thohdieng u la maham ban leh da ka aiñ lada ym pynphai biang ïa ka jingkynnoh ba la kynthup lang ïa ki jaka jong ka ADC.

Ïa u Pradyot u la synran lang da u Chief Executive Member ka TTAADC u Purna Chandra Jamatia, u CEO barim u CK Jamatia badkiwei de ki nongialam ka party ki la leit ban ia kynduh ia ki heh jong ka Sepahijala district hapoh ka jingialam u SDM u Bishramganj Binky Saha, uba bat ruh kum u Executive Member ka Nagar Panchayat.

Katei ka jingialang kaba la long ha Dak Bungalow jong ka sorkar ha Bishramganj, ka long ban pynshai ia ki pud ki sam jong ki Municipal hadien ba katei ka seng ka la kynnoh ba jan 30 percent ka notified civic area ka hap hapoh ka jingpeit jong ka ADC.

Hadien ka jingialang, u heh jong ka TIPRA u la ther tyngeh ia ka bor synshar, da kaba kynnoh ba ka iaid khlem ki kot ki sla kiba biang shaphang ka jaka bad ki shaniah ha ki “natural boundaries” bad ki thup nongthep vote ban pynshisha ia ka jingpynheh.

“Ngi la kren shai kdar ba ngin ym ailad ban wan kyntur ia ki jaka jong ki ADC ha ka kyrteng jong ka Nagar Panchayat, ban pynlong ia ka elekshon ha ka jaka jong ka ADC kam mut ba ia ki jaka lah ban shu aiti beit”, la ong u Pradyot.

Da kaba kynnoh ba katei ka jingpynheh ka pynkhein ia ki kyndon riti synshar katkum ka Sixth Schedule, u la ong ba ki nongshong shnong kiba shah ktah kin pynkynriah ia ka iingbishar lyngba ka jingmudui Public Interest Litigation, ha kaba ka seng kan ai jingkyrshan pura.

“Ngin nym ai wat tang shi inshi ruh ka jaka jong ka ADC lada ka jingpynheh ka long kaba be-aiñ.Kane ka dei shaphang ka hok jong ngi bad ka jingim jong ngi”, u la pynskhem.

U Debbarma u la kynnoh ba ka bor synshar kam shym la pynmih ia kano kano ka map kaba la mynjur da ka ain ha ka jingialang ban pynshisha ia ki jingkynnoh jong ka.

“Kumno phin pynrit ia ki jaka riewlum khlem ka jingpynshisha katkum ka ain? Haduh 30 percent na ka jaka la shim khlem kano kano ka nongrim”, u la ong bad bynrap ba ka rukom treikam jong ka sorkar ka pynpaw ia ka “jingpyrkhat barim jong ka juk communist”.

Ha kajuh ka por u la kyntu ia ki paidbah ba kim dei ban pynlong ka jingsngew pher jaitbynriew (communalize) ia katei ka mat.

“Kane kam dei ka kam tribal pyrshah ia ki non-tribal lane ka kam sain pyrthei, ka Nagar Panchayat ka dei ban neh kum ka Nagar Panchayat bad ka ADC ka dei ban neh kum ka ADC, kane ka dei tang ka mat jong ka riti synshar ka ri”, u la ong.

Na ka liang u SDM u Binky Saha u la kubur ba ki ophisar kim shym la lah ban pynmih ia ka map ba thikna kaba pyni shai ia ki jaka jong ka Gram Panchayat (GP) bad ka Village Committee (VC) ha ka jingialang.

U la ong ba ka bor synshar kan pan jingiarap na ka tnad jong ki jingthoh jingtar bad ka jaka shong jaka sah — ka nongsumar ia ki map ba thikna — bad kan pynlong ia ka jingpynkhreh lang ia ka jingpynbeit pud ia ka jaka.

U Saha u la pynskhem ba tang ki jaka jong ka Gram Panchayat la pynrung ha ka Nagar Panchayat katkum ka jingpynbna jong ka tnad Panchayat bad ki pud ki sam jong ka natural boundaries, bad ym shym la pynrung ia ki jaka jong ka Komiti Shnong hapoh ka TTAADC.

Hynrei ka la kam ba ka Directorate mynta ka duna ïa ka map ba kyrpang kaba pynïapher shai ïa ki pud synshar jong ka TTAADC bad ki bym dei jong ka TTAADC.

Shwa ia kane, u Myntri Rangbah ka jylla u Dr. Manik Saha u la wad ban pynjai jai ia ka jingiakren, da kaba pynskhem ba ym shym la ioh jaka bad kynnoh ba “don ki briew” kiba pyrshang ban pynmih jingkulmar hapdeng ki paidbah.
Ki jingkynnoh kiba ïa pyrshah ki la pynmih ïa ka jingkynnoh ba ki jingia paid ki nang jur hapoh ka jingïatreilang jong ka BJP–TIPRA Motha, kiba baroh ar tylli ki la kular paidbah ban ïada ïa ki jingmyntoi jong ki riewlum.

Ka jingïakynad halor u pud u sam ka lah ban long ka mat ba kongsan ha ka jingpynkhreh elekshon ADC ban wan, ha kaba ka TIPRA Motha ka lah ban pynjur ïa ka jingïakren halor ka hok long trai ia ka jaka puta ha kylleng ki jaka bad ka jingsynshar hi.

Da ka jingkiew jingbitar na baroh arliang mamla, ka Bishramganj mynta ka la mih kum ka jaka ba thymmai jong ka saiñ pyrthei, kaba pynpaw ïa ka jingbymsuk kaba nang jur hapoh ka kynhun synshar ha shwa ka aiom elekshon kaba don jingeh bha.