Agartala, Naitung 09 : U Chairman ka PITRA Motha Pradyot Kishore Debbarma ula bthah ia ki Nongialam ka Party ba kin pynneh kumjuh ia ki jingtynjuh bor hapoh bad shabar ka Iingdorbar Thaw Ain ka Jylla ban pynbor ia ka Sorkar Pdeng ba kan pynurlong noh ia ka jingdawa jong ki halor ka Greater Tripraland.
U Debbarma ula kynnoh ruh ba katto katne ki Nongialam ka BJP ha Tripura kila pyrshang ban pynpait pynra ia ka party jong u bad ula mudui ruh pyrshah iaki sha ki Nongialam ka BJP ha Delhi.
Ula ong ba ha u, ka Jaidbynriew ka kham kongsan bad hadien kane, ka wan ka party bad na ka bynta ka bha ka miat jong ka Jaidbynriew, u lah ruh ban iapein bad la ka jongka party.
U Debbarma ula kynnoh ba kala don ka jingiasuhbuit ban pynpra ia ka jingiatylli ki riewlum bad ban pyntroin ia ka TIPRA Motha, ka party kaba don haduh 13 ngut ki MLA ha ka Iingdorbar ba 60 ngut jong ka Tripura.
Ula pynpaw ruh ba don katto katne ki briew kila tyrwa pisa bad ki kam sha ki nongialam ka TIPRAMotha bad ruh sha ki MLA, ba pynshlur ia ki ban phet bad thaw ia ka party thymmai.
U Debbarma ula kyntu ia kito kiba kwah pisa bad ki kam ba kin iehnoh ia ka TIPRA Motha, namar ma u hi un ym iapein bad ka jingdawa ia ka Greater Tipraland.
Pule lang ia kane: Manipur : Pynlong rally palat 150 ngut ki samla pule Doktor ban pyrshah ia ka kam iaumsnam
