Agartala, Nailar 28 : Ka Twipra Students Federation (TSF) kaba dei ka seng ki samla pule riewlum ka Tripura, kala khot ia ka pakhang shnong ba 12 kynta ha baroh kawei ka Jylla hynne ka sngi Nyngkong, ba dawa pyndonkam ia ki dak thoh roman ha ka ktien Kokborok bad ban mynjur noh ia ka 125th Constitutional Amendment Bill.
Da ki spah ngut ki nongiakhih jong ka TSF kila shah kem na kylleng ki jaka kynthup ha Nongbah Agartala. Kine ki nongiakhih kila khang ia ki surok ban kyrshan ia ka pakhang shnong ha baroh kawei ka Jylla, kum ka dak ban pyrshah ia ka jingleh mynthi ka Sorkar ha kaban pynurlong ia ki jingdawa bala slem jong ka seng.
Ka TSF kala khot ia kane ka pakhang shnong haba pynpaw ba ha kine ki 50 snem bala leit, ka TSF kala iai kren ia kine ki jingdawa hynrei ym don sayia kawei ruh ka Sorkar kaba pynsngap ne pynbeit ia kine ki kam.
Kane ka seng ba khlain bor bha jong ki samla pule kala kynnoh ba arbnai mynshuwa, ki nongialam ka TSF kia iakynduh bad aiti iaka dorkhas sha u Lat ka Tripura SN Arya ban pyntreikam ia ka dak thok Roman ha ka ktien Kokborak bad ia kynduh ruh ia u Myntri Rangbah ka Jylla Dr Manik Saha halor kane kajuh ka kam.
Hynrei ka ong ba ka Sorkar kam I don mon ban leh eiei halor kane ka jingdawa bad ka paw ruh ia ka jingbym shimkhia satia na ka bynta ki riewlum. Kala ong ba kane ka jingleh ka Sorkar kala pynkut lad ia ka TSF haduh ba kan hap shim ia kane ka lynti ban khot da ka pakhang shnong.
Kala dawa ruh ba ka Sorkar India kan kren noh mardor ia ka 125th Amendment Bill hapoh Iingdorbar Parliament.
