Nongpoh, Nailar 28: Shibynta ka jingrakhe ia ka National Sport Day, ka ophis u District Sport Officer, Ri Bhoi District, ka la pynlong ia kane ka jingrakhe da kaba pynlong ia ki lympung ialehkai bapher bapher ba la wan shimbynta ruh da ki 6 tylli ki skul jong ka thain Nongpoh. Ia kane ka jingrakhe la pynlong ha ka madan NSCA, Mini Stadium Pahamsyiem.
La wan ban sakhi bad ai mynsiem ha kane ka sngi da ki arngut ki thei iakhun kti (Arms Wrestling) kiba kynthup ia ka Kong Margrete Pathaw, ka thei ialehkai ba pawnam ka ri India kaba na Ri Bhoi District bad ka Kong Vinnie Kharthangmaw nalor u Bah Bobby L Nongbet, DSO ka Ri Bhoi District nalor kiwei kiwei ki ophisar.
Ha kane ka sngi, la pynlong ia ki lympung ialehkai kiba kynthup ia ka tug of war (iatan tyllai) ha kaba ka St. Paul Higher Secondary School ka la iohrah ia ka nam lahduh da kaba pynliem ia ka Ri Bhoi Presbyterian Hr. Sec School bad ha ka jingiakhun ia ka Mawpoint jong ki kynthei, ka Nongpoh Nepali Sec. School ka la long ka nongjop da kaba pynliem noh ïaka Christian Hr. Sec. School.
Na ka liang u DSO, u la pyntip, ba la pynlong ia kane ka jingrakhe kum shibynta ban kynmaw burom ïa ka sngikha jong uwei u rang ïalehkai Hockey jong ka Ri India u Major Dhyan Chand ba la ai nam ruh kum ka National Sport Day ia kaba la ju rakhe ha ka 29 tarik Nailar man la u snem.
