Agartala, Jymmang 20: Ha ka jingkylla iaka polisi khaii pateng, ka India ka la pynjari da ki kyndon kiba tyngeh bha ïa ki mar ki ba wan na Bangladesh lyngba ki Land Port, ka sienjam kaba la wanrah ia ka jingkhihwin ha kylleng ki jaka khaii pateng ha khappud shatei lam mihngi (North East).
Ka Directorate General of Foreign Trade (DGFT) ka la pynbna ba la khang ban shalan ia ki mar ba wanrah na Bangladesh kum ki jain ba la dep suh, ki jingbam, ki soh, ki umsoh, ki tiar plastic bad PVC, bad ki tiar dieng kiba wan na Bangladesh lyngba ki Land Port.
Kum kine ki mar ki lah ban rung sha India tang lyngba ki kad duriaw jong ka Nhava Sheva bad Kolkata.
Kane ka jingkylla ha ka polisi ka la wanrah ia ka jingpynthut ban poi ki mar ha ki jaka khappud ba kongsan.
Namar ka jingpynkylla haka Policy haduh 36 tylli ki trok kiba kit jain kiba shongdor kumba T.5 klur, kila sahkut ha ka jaka “no man’s land” hapdeng ka Benapole (Bangladesh) bad ka Petrapole (India), khlem lah shuh ban ïaid shakhmat namar ka jingpyntreikam kynsan ia ka jingbthah thymmai.
Halor kane ka jingpynkylla iaka Policy, la khot ïa ka jingïalang High Level Meeting ha ka 19 tarik Jymmang ha Integrated Check Post (ICP) ha Agartala.
La pynïaid iaka jingialang da u Shailesh Kumar Yadav, Director of Industries & Commerce, Tripura, haka jingdon lang ki ophisar na ki Custom, ki Border Security Force (BSF), Land Port Authority of India, Immigration, bad ki nongmihkhmat na ki kynhun kiba wanrah bad shalan mar shabar ri.
Katba ki jingkhang pynpoi mar ka Bangladesh kala wanrah iaka jingsngewkhia jong ki nongkhaii, hynrei katto katne ki kynhun khaii pateng ha ka thain ki la pynpaw ia ka jingkyrshan.
Ka All Tripura Merchant Association ka la pdiang sngewbha ia kane ka jingleh, da kaba ong ba ka India ka pynmih ia ki mar kiba kham bha.
Katkum ka jingwad bniah jong ka Global Trade Research Initiative (GTRI), ki jingkhang pynpoi mar na Bangladesh kan ktah iaki mar ba shong dor kumba $770 million, kaba long jan 42% na ka jingwanrah mar jong ka India na Bangladesh.
Ia kane ka sienjam la iohi kum ka jingpynshitom bein kaba lah ban long ha ka khaii pateng hapdeng ka jingjur jong ka jingiakynad hapdeng kine ki ar tylli ki ri.
Ka DGFT ka la pynshai ba ki mar ba donkam kum ki dohkha, liquefied petroleum gas (LPG), edible oils, bad ki mawria yn dang bteng ban wanrah lyngba ki jaka bad ki kad lieng kiba la don lypa.
Kane ka jingkylla ka pyni ia ka jinghiar kaba pawnam ha ka jingiadei arliang mamla, kaba la kylla ha ka histori katkum ki jingjia ha ka sain pyrthei ha baroh ar tylli ki jaitbynriew.
Ki jingkhang haka khaii pateng ka pyni ia ka jingbymsuk jong ka India kaba nang jur bad ka jinglong jingman ha ka sain pyrthei ha Bangladesh bad ki don ka jinglah ban pynjynjar shuh shuh ia ka jingiadei para ri.
