Agartala, Naiwieng 24: Ki pulit k Tripura ha ka sngi Nyngkong kila ioh ban kem ia lai ngut ki briew ba kynthup ia u wei uba la shah kynnoh ba u dei u snar nongkhaii tiar siat na Bihar bad la kurup noh ia ar tylli ki tiar siat, saw tylli ki magazine bad lai tylli ki mobile phone ha Agartala.
U Superitendent of Police (SP) ka West Tripura u Namit Pathak, ha ka jingdon lang ryngkat bad u Additional SP u Dhruva Nath, kila pyntip ba la kem ia ki ha ka por ba u Officer-in-Charge jong ka AD Nagar Police Station, ha ka por ba u ïaid pahara hajan ka jingkieng Bandeshwar ha shilynter ka bypass, u la ïohi ïa lai ngut ki briew kiba suba jur. Hadien ba la talasi, ki pulit ki la ioh kurup ar tylli ki suloi rit ryngkat bad saw tylli ki magazine na ka met jong ki.
Kine ki briew kiba la shah kem la iathuh ia ki kum u Tinku Debbarma bad u Sumendra Debbarma, kine baroh ar ngut kidei kiba shong basah ha Barkathal ha Tripura, bad u Sibesh Kumar, uba shong basah ha Dumeria Khurd, Bihar, uba la shah kynnoh ba u wanrah ia kine ki tiar siat sha Tripura.
Na ka liang jong u SP pathak u la ong ba ia ka case la register hapoh ka kyndon Arms Act bad ka jingtohkit kaba nyngkong la lap ba ia kine ki tiar la kit ha katei hi kajuh ka sngi na Bihar.
“Tang hadien ba la dep ka jingtohkit, ngin sa lah ban pyntikna ba kumno la wanrah ia kine ki tiar, bad kaei ka jingthmu ba sha lyndet bad hano ki thmu ban pynpoi ia kine ki tiar,” ong u SP.
Kawei ka auto rickshaw ia kaba kila pyndonkam da ma ki, ki pulit kila kurup noh ia ka ruh.
Lah ban kdew hangne, Ka AD Nagar Police Station, ka marjan bad ka Agartala railway station, bad katkum ki record kila don shibun tylli ki jingjia khaii tiar ha kine snem kiba leit noh. Ha kiba bun ki case la lap ba ki tiar siat ki dei kiba la wan shalan tuh sha Tripura lyngba ka rel, ha kaba mynshwa la ju pyniadei bad ka lynti iaid jong ka Nagaland.
