Agartala, Nohprah 22 : U Myntri kam Pohiing ka Ri Amit Shah ha ka sngi U Blei ula ong ba ka jingshongsuk kala wan ha Tripura hapoh ka jingialam jong u Myntri Rangbah Duh ka Ri Narendra Modi.
Ula ong ba ki kam pynroi bapher bapher kila nang wan hapoh ka Jylla bad kumjuh ruh lah ban ban pynbeit ia ka kynrum kynram jong ki paid Reang kaba la iaid la palat 23 snem.
U Myntri kam pohiing ula kren ia kane hadien ba wan jngoh ia ka Reang Tribal Settlement Camp.
U Myntri ha kane ka sngi ula buh mawnongrim bad plier uh ia ki 13 tylli ki project kam pynroi ha ka Jylla kaba la mang ban pynlut haduh T.668.39 klur.
Haba kren ha ka jingialang ha madan ka shnong Kulai RF ha Dhalai District, u Amit Shah ula pynrem jur ia ka Sorkar Left Front barim namar ka jingbym leh eiei na ka bynta ki paidriewlum Reang bad kiwei kiwei ki briew.
Ula ong baka Sorkar mynta kala pynlong haduh T.900 klur ban pynbiang ia ka jajak sah ia palat 40,000 ngut ki riewlum Reang ha ki 12 tylli ki jaka hapoh ka Jylla Tripura.
“Da kane ka jingpynbiang jaka sah, ki hajar ngut ki briew kiba la sngew kut lad, kila ioh mynsiem pat ban im ka jingim ba thymmai. Ki khun ki kti jong ki kin sa ioh ia ka pule ka dangle bad kiwei kiwei ki jingdonkam ba kongsan” ula ong haba bynrap b aka Sorkar kan sa pynbiang lut ia baroh ki jingdonkam kum ka umbam umdih, ka bording elektrik, ka koit ka khiah, ka pule dangle, ka jingpyniasoh surok sha baroh ki 12 tylli ki jaka ba sah ki Reang.
Palat 37,135 ngut ki paid Reang na kylleng ki jaka kila wan phet na Mizoram ha u snem 1997 hadien ba khie ka thma iapher Jaidbynriew ha kane ka Jylla. Ka Sorkar kala pynbiang jaka sah ia ki ha ki 12 tylli ki jaka jong ki 4 tylli ki District ka Tripura ba kynthup ia ka North Tripura, Dhalai, Gomati, bad South Tripura.
