Agartala, Lber 22 : Ha ka sien ba nyngkong eh ha kine ki 72 snem ba pynlong elekshon, ka Congress bad ki Left Party kila iatreilang kum kawei ka kynhun ban iakhun ia ka elekshon Lok Sabha pyrshah ia ka BJP.
Ha ka elekshon MLA ba dang shu dep, kine ki artylli ki party kila iakhun pyrshah ia ka liang synshar ka BJP.
Ha Tripura West Lok Sabha seat, ka jingiakhun kan long hapdeng u kyrtong ka BJP bad u Myntri Rangbah barim ka Tripura u Biplab Kumar Deb bad u President ka Congress Ashish Kumar Saha, uba dei u kyrtong monlang ka INDIA bloc.
U President ka Congress Saha bad u Congress MLA Sudip Roy Barman kila mih noh na ka BJP ha u Rymphang 2022 hadien ba kila shah jied kum ki MLA na ka ticket ka party ha u Lber 2018.
Na ki artylli ki Lok Sabha seat ka Jylla, ka Tripura West bad Tripura East-ka jingiakhun hi kan itynnad eh ha Tripura West Lok Sabha seat, kaba ju jop da ka CPI(M) haduh 11 sien naduh u snem 1952.
Ka Left Front ka dei kaba ju iakhun ia ka elekshon pyrshah ia ka Congress, kaba la wan khatduh eh ha ka bor ha Tripura ha u snem 1988.
