Agartala, Jymmang 04 : Kawei na ki artylli ki Iew Khappud (Border Haat) ba don ha khappud ka Tripura bad Bangladesh, kan sa plie biang ha ka khaii ka pateng naduh ka 9 tarik Jymmang hadien ka jingkhang dam bala kynjoh lai snem mynta.
Hadien ka jingialang ba dang shen hapdeng ki Bor District ka Feni (Bangladesh) bad ka South Tripura (India), la rai ban plie biang ia ka khaii ka pateng hapdeng ki Iew Khappud ka Purba Madhugram (Bangladesh)bad ka Srinagar (South Tripura) naduh ka 9 tarik Jymmang.
Ka jingiakren kala iaid ruh ban plie noh sa ia ka iew khappud Kasba (Bangladesh) bad ka Kamlasagar (Tripura) kaba don ha Sepahijala District.
Ki saw tylli ki Iew Khappud, mar artylli ha Tripura bad Meghalaya, kila khang naduh u Lber 2020 hadien ka jinglynshop ka khlam Covid-19 bad ki hukum khangdam, kaba la wanrah ia ka jingduhnong kaba khraw ia ki paidbah ba shong ba sah ha ki shnong khappud.
Baroh artylli ki Sorkar-ka Tripura bad Meghalaya kila ban jur ia ka Sorkar Pdeng ban iakren bad ka Sorkar Bangladesh ha kaban lah plie biang ia kine ki Iew Khappud.
Artylli na ki iew khappud ha Meghalaya-kawei ha Balat (East Khasi Hills) bad ha Kalaichar (South West Garo Hills) kila plie naduh u snem bala lah bad ka khaii ka pateng ha kine ki Iew kila iaid mynta shisien ha ka shitaiew.
