Imphal, Jymmang 3: Ban tehlakam ia ka jingkulmar kaba la nang jur ha Manipur, ka Sorkar Jylla kala khang ia ka jingtrei kam ka kor Internet ha kine ki san sngi ban wan ha baroh kawei ka Jylla.
Ha ka sngi Balang, da ki hajar ngut ki briew kila iamih ban shimbynta ha ka “Tribal Solidarity March” bala khot pynlong da ka Seng ki samla Pule ha baroh ki 10 tylli ki District ka Manipur, ban pyrshah ia ka jingdawa jong ka Jaidbynriew Meitei ban ai jingithuh ia ka hapoh ka thup Scheduled Tribe ka Jylla.
“Ki Social Media kila kylla long ki atiar ban pynsaphriang ia ki khubor hamsaia bad ban pyndinkam ha kaban kynshoit ia ki paidbah, kaba lah ban ktah jur ia ka shongsuk shongsain ha ka Jylla Manipur” ong ka hukum.
Kat kum ka hukum ba pynmih hynne ka sngi, kala ong ba ka jingkhang shipir ia ka kor internet ka dei kaba donkam khnang ban khang ia kano kano ka jingpynthut ia ka shongsuk sjongsain hapoh u pud u sam ka Manipur.
Ka jingkulmar kala mih hapdeng ka rally bala pynlong da ka ATSUM kaba pyrshah ia ka jingdawa ithuh ST jong ka Jaidbynriew Meitei.
Watla kane ka jingiaid paidbah ka long kaba iaid suk, hynrei kila don pat ki jingjia ba ki nongiakhih kila thang ia ki taiar bad don ruh kiba la leit thang ia ka forest beat office kaba don ha Bungmual ha Manipur.
