Tripura | Dang artatien ka jingiasam constituency ka BJP–TIPRA Motha ha ka elekshon TTAADC

Agartala, Lber 21: Satang lai taiew ban long ka election Tripura Tribal Areas Autonomous District Council (TTAADC), ka jingbym thikna ka dang ïai bteng halor ka jingïapynbeit ïa ka jingïasam constituency hapdeng ka Bharatiya Janata Party (BJP) bad ka paralok jong ka, ka TIPRA Motha. Ha kajuh ka por, ka Special Intensive Revision (SIR) jong ka thup kyrteng thep vote ka la mih kum ka mat sain pyrthei kaba kongsan ha kane ka jylla.

Ki ar tylli ki mat kata ka jingïatreilang bad ka jingpynkylla ïa ka thup jong ki nongthep vote ki la long kiba kongsan ha ki jingïakren ha ka jingïalang jong ka seng BJP kaba la long ha Saheed Bhagat Singh Youth Hostel ha ka sngi saitjaiñ.

Ha kane ka jingialang la don lang u myntri rangbah ka jylla u Manik Saha, u national general secretary ka BJP u Tarun Chugh, u SIR in-charge jong ka thain shatei lammihngi u Vinod Sonkar, bad u state president u Rajib Bhattacharjee, ha ryngkat ki myntri, ki MLA, bad kiwei kiwei ki nongialam ba rangbah jong ka seng.

Haba kren sha ki lad pathai khubor, hadien ka jingialang, u Myntri Rangbah ka jylla u Saha u la pynpaw ba katba ka jingïatreilang bad ka TIPRA Motha ka dang sah, hynrei ka rai kaba khatduh halor ka jingïasam constituency na ka bynta ka elekshon TTAADC ka dang sah ban shim da ki nongïalam ka party na Delhi.

“Kumba nga la ong mynshwa, ki don ha ka jingïateh lok bad ngi—ngi la don lypa ïa kata ka jingïateh lok ha ka jaka jong ngi. Ngi kut jingmut ban pynneh ïa ka burom bad ka akor jong kata ka jingïateh lok. Hynrei kano kano ka rai kaba khatduh yn sa shim ha ka por kaba biang.Ki nongïalam jong ngi ha Delhi kin ïa shong lang bad ïakren ïa kane ka kam,” u la ong.

“Ha kane ka khyllipmat, ym pat don kum kine ki jingiakren, kumta kan ym long kaba dei ban kren eiei shaphang ki jingtip ba bniah ne ka lynti kaba kiei kiei ki lah ban shim.Kata kan sa paw shai tang hadien ba la pynlong ia ki jingiakren,” u la bynrap.

Nalor ka jingbym thikna jong ka jingïatylli, ka jingleh ia ka SIR ka la ïoh ïa ka jingkren kaba shai ha ka kam saiñ hima sima, khamtam haba kheiñ ïa ka jinglong rit paid jong ka Tripura kum ka jylla ba la ker sawdong na lai liang da ka Bangladesh.

U Myntri Rangbah ka Jylla u la kdew ba ka jingpynkhreh ia ka SIR ka la dep ban ïaid ha ki bynta bapher bapher jong ka ri bad ka la sdang khlem da thikna ha Tripura, watla dang ap ïa ka jingpynbna ba pura.

Ka rukom pynkylla thymmai, kaba la shim da ka Election Commission, ka thmu ban pynthymmai ia ki thup kyrteng thep vote da kaba pynrung ia ki nongthep vote kiba dei hok bad weng noh ia ki bym dei hok.

Ia kane ka mat la ju pynpaw bunsien da ka TIPRA Motha, kaba la pynpaw ia ka jingsngewkhia halor ka jingkynnoh ba don ki jingwan rung beain na kylleng u pud u sam jong ka Bangladesh bad ka jingktah kaba lah ban mih na ka jingdon jong ka elekshon, khamtam ha ki jaka jong ka TTAADC. Ka seng ka la dawa ban pynkylla bniah ia ki thup kyrteng nongthep vote shwa ka elekshon.

Da kaba pdiang ïa ka jinglong ba sngewkhia jong kane ka mat, u Saha u la ong, “Ka SIR ka dei ka rukom synshar kaba kongsan bha ban pynthikna ba tang ki nongthep vote ba shisha kin shah kynthup katba dang ithuh bad weng ïa kino kino ki jingrung be-aiñ,” katba u la pynskhem ba ki dang shim ïa ki sienjam ban pynthikna ba ym don nongthep vote kiba dei hok ban shah kyntait.

U la ong ban pynsngewskhem ïa ki nongthep vote kiba la don lypa, kito kiba la dep pynrung kyrteng kin donkam tang ban pyndep ïa ki jingdonkam, katba ka jingleh kan pynlah ïa ki nongthep vote kiba dang thymmai ban ïoh rung ha ka thup kyrteng.

Katba ki jingiakren sain pyrthei ki dang iaid bad ka tarik elekshon ka nang jan, baroh ar ka jingkylli jong ka jingiatehlok kaba khlem pat lah ban pynbeit bad ka rukom treikam jong ka SIR ki dang pynwan dur ia ki lynti jong ka elekshon jong ka TTAADC, kaba wanrah ia ki mat jong ka jinglong kyrpang, ka jingwan buhai shnong.