Agartala, Rymphang12: U myntri rangbah (CM) barim ka Tripura u Manik Sarkar u la kynthoh tyngeh pyrshah ia ka jingkren jong u PM ha ka por ka jingpynlong ia ka rally ialap ilekshon hynnin ka sngi Saitjain ha Tripura.
U Sarkar u la ong ba ka jingkren jong u PM Modi ka dei ka bym don ia ki jingshisha bad pyrshang ban buhrieh ia ka rukom synshar bym larkam jong ka sorkar BJP ha Tripura.
U Sarkar u la ong ruh ba u PM Modi um dei satia ban ai ia ki jingkren ki bym shisha bad kiba ialam bakla ia ki paidbah.
Hashwa ka jingpynlong ia ka ilekshon assembly ha ka jylla, ka thma ktien hapdeng ki party sain hima ka la iaid shad shad bad na ka liang ki nongialam sain hima ruh kim shym la sangeh ban iakynthoh iwei ia iwei pat.
U Sarkar u la ong ba ha ka por ba u dang bat kum u CM ka jylla (1998-2018) u la leit ban iakynduh ia u PM Manmohan Singh na ka bynta ban pynioh bording ilektrik shapoh Bangladesh, bad hadien kane la sdang ia kane ka kam pynioh bording ha ka snem 2013-14, kata ha ka por” ka jingsynshar jong ka sorkar Left Front, katba na ka liang u Modi u la kam ba ka jingpynioh bording sha kane ka ri ba marjan ka la sdang hadien ba ka sorkar BJP ka la wan ha ka bor ha Tripura ha u snem 2018.
“Hadien ba ka sorkar BJP ka la wan ha ka bor, ka rukom synshar leh donbor ka la sdang. Ha khlaw ki dang don katto katne ka discipline, hynrei mynta kam don ka jingsynshar jong ka ain ha Tripura hapoh ka jingsynshar jong ka saffron party, ” Ong utei u CM barim.
Nalor kata u la ong ruh ba u PM u pyrshang ban pynkohnguh ia ki paidbah ka jylla, hynrei kane kan ym seisoh satia namar na ka liang ki nongshong shnong ka jylla ki la kut jingmut ban pynherkrad ia ka sorkar BJP ha kane ka ilekshon ka ban long ha ka 16 tarik mynta u bnai.
