Shillong, Rymphang 12 : Ki shipai Border Security Force (BSF) ha ryngkat ki Pulit, kila ioh ban kem ia lai ngut ki nongkhaii beain, kiba thmu ban khaii beain ia 40 tylli ki masi sha Ri Bangladesh.
Ia kine ki nongkhaii bad ki masi la ioh ban bat ha ka jingpynapshrip myn ha ka 10 tarik Rymphang ha surok Muktapur-Amlarem, West Jaintia Hills.
Ki shipai kila ioh bat haduh 3 tylli ki trok kiba kit haduh 40 tylli ki masi ba thmu ban pynpoi sha Bangladesh. Kine ki Nongkhaii ki dei kiba na Ri-Bhoi District bad la aiti noh ia ki bad iaki masi sha ka Police Outpost ha Muktapur ba kin leh ia kaba donkam.
Ki BSF kila pyntip ba naduh u Kyllalyngkot mynta u snem haduh kine ki sngi kila ioh ban kurup 450 tylli ki masi kiba thmu khaii beain sha Bangladesh na kylleng ki thaiñ khappud ka Jylla.
