Agartala, Risaw 29 : U Myntri Rangbah ka Tripura Manik Saha ha ka sngi Nyngkong, ula ong ba ka lynti ban tehlakam ia ka jingdheng kali ha Jylla khamtam ha Agartala, dei ban shim noh ia ki sienjam ban pyrrkhing ia ka jingiadie kali ban lah tehlakam ia ka jingnang bun kali.
U Manik Saha haba shong bishar kam halor ka jingpynbeit iaid kali,ula ong ba la dei ruh ban khmih bniah bha halor ka jingbret noh ia ki kali kiba la palat ia ka 15 snem.
“Nalor kane, dei ruh ban shim ia ki sienjam ban pyrrkhing ia ka jingiadie kali. Ki Pulit Traffic kin hap ban peit ngor bha ha kaban tehlakam ia ka jingniah sted ki kali ha ki flyover bad kiwei kiwei ki surok” ong u Saha.
Ula bynrap ba ki Pulit Traffic, Tnad Transport bad ka Agartala Municipal Corporation (AMC) ki dei ban iatreilang ban pyn duna ia ka jingkhapngiah ne dheng kali hapoh ki surok ba iaid kali khlem kut jong ka Nongbah.
“Donkam bha ia ka jingiatreilang jong baroh ki Tnad treikam khnang ban iaid lait ia ki dheng kali. Dei ban pyrrkhing bha ia ki No-Parking Zone hapoh ka Sor bad dei ruh ban leh tyngeh ia ki ningniah kali kiba pynkhein ia ki ain niah kali haba donkam” ula ong.
U Saha ula ong “Ka Sorkar Jylla kala pynkhreh ia ka plan kaba bun ban pynthikna ba ki nongshongshnong ki lah ban leit ban wan da ka jingshngain ha ki surok. Ka long kaba donkam ban nang pynbun ia ki Parking Zone ha Agartala ban pynduna ia ka jingdheng kali”.
Ula bthah ruh ia ka tnad Traffic, AMC bad tnad Transport ba kin tehkyndon lang ia ka jingiaid ki rickshaw battery hapoh ki surok ba iaid kali khlem sangeh jong ka Agartala.
