Shillong, Rymphang 17 : U Myntri Rangbah ka Jylla Conrad K Sangma ula pyntip ha Iingdorbar Thaw Ain ba ka Sorkar Jylla kala thung haduh 36 ngut ki consultant shimet bad 59 tylli ki kompani consultant ba kin kyrshan ia ki prokram ka roi ka par ha Jylla.
Ula pyntip ruh ba ka jingsiew sha kine ki consultant ka shong eh kat kum ka jingshakri jong ki.
“Ka jingpynlut baroh lang ha ka shisnem ne ka jingsiew ba shibnai ia ki consultant shimet ka long T. 4.35 klur ha u snem 2024-25” ong u Conrad haba pynshai ba ia ki kompani consultant ym shym la siew satia da ka tulop hynrei kila ioh ia ka jingsiew kat kum ka jingshakri bala buh ha ka contract. “Lada kim lah ban ai ka jingshakri kumba buh, kin ym ioh jingsiew satia”.
Haba jubab ia ka jingkylli bynrap jong u MLA ka Mawryngkneng, ha ka Dorbar Mang tyngka hynne ka sngi Ba-ar, u Myntri Ragbah ula pyntip ba 19 na ki 36 ngut ki consultant shimet-kumba 52%- ki dei ki trai jylla kiba don ia ka kyrdan pule ha ka Management, Agriculture bad Environmental Science.
U Conrad ula batai ba bun na ki consultant la ai kam kat kum ka jingdonkam ki project kum ha ka jing pynkhreh ia ki detailed project report, ka environmental bad social safeguard, bad ki kam ba iadei bad ka thied ka pet, kiba long kat kum ki kyndon bala buh da ka World Bank bad ADB.
“Ka bor bala ai sha ki Nongtrei Sorkar kam dei satia kaba lah ban shim noh. Ki agency kila wan ban kyrshan ia ka rukom treikam ka Sorkar. Ka bynta ba hakhmat eh ka long ba kin kyrshan ia ka rukom treikam, ym ban mushlia bad ka rukom treikam” ula pynshai.
Halor ka jingbei tyngka, u Conrad ula ong ba ka Meghalaya kala lah ban pynioh kumba T.12,000 klur na ki Externally Aided Project (EAP), kaba pynlong ia ka Jylla kum kawei na ki Jylla bar it, ban ioh bun eh ka EAP haba nujor ruh bad ki Jylla kiba heh.
“Ki don shibun ki kam ba hap leh. Phi donkam ban don ia ka bor ban lah pyntreikam ia ka song pisa. Ka Meghalata kala lah ban pyni ialade bad ioh ia ka song pisa” ula ong haba ai nuksa kum ia ka Sohra Project ba T. 200 klur, ka Smart City Mission bad Unity Mall, ha kaba ka Jylla ka dei kawei na kiba nyngkong eh ban phah ia ki jingtyrwa bad ioh ia ka jingmynjur.
Haba jubab ia ki jingkren u MLA ka UDP Bah Paul Lyngdoh, u Conrad ula ong ba ki kyndon ban ieng pyrshah (conflict-of-interest) ki dei ban don khnang ban khanglad ia ki consultant ba kin trei na ka bynta ki kompani kiba kwah ban wan shakri ha ki Tnad ba ki ai jingmut.
Ka jingsiew baroh lang sha ki kompani consultant ka la kot T.131 klur, ia kaba T. 116 klur la siew napoh ka Administrative Expenditure bala buh hapoh ka EAP. Ka Jylla kala pynlut T.10 klur haduh mynta.
“Ia ki consultant la thung kat kum ka jingdon ki project. Ka jingshakri jong ki ka kut noh ynda kut ki project” ong u Conrad.
