Imphal, Jymmang 05 : Ki shipai Indian Army kila pyntip ba ka jingtrei borbah jong ka kynhun ki Shipai, kala lah mynta ban tehlakam ia ka jingkulmar hapoh ka thain Moreh bad Kongpokpi bad ka jingpyrshang ka dang iai bteng ban wanrah noh ia ka jingjai jai sa ha Imphal bad ha ka thain Churachandpur.
“Ngi la lah ban tem ia ka jingkulmar ha Moreh bad Kongpokpi bad ka jinglong jingman mynta kala jai jai. Ngi la pyrshang borbah ban wanrah ia ka jingjai jai sa ha Imphal bad Churachandpur. Ka jingwanrah shuh shuh ia ki shipai ha Manipur kan dang iai bteng” ong ki Heh ka Indian Army.
Ula ong ba ka Indian Army kala wanrah ruh ia ki pyrton shipai na Nagaland sha Manipur bad bynrap “Nalor kane, ki shipai Indian Air Force kin dang iai bteng ban wanrah ia ki pyrton shipai sha Manipur naduh mynta ka miet na Guwahati bad na Tezpur”.
Ki shipai bad ki paramilitary (Assam Rifles) kila don mynta ha kylleng ki jaka ka Manipur bad kila iaid flag march ban tehlakam ia ka shongsuk shongsain hadien ka jingmih ka jingkulmar ha ka 3 tarik Jymmang n aka rally ka All Tribal Students Union (ATSU) Manipur ban pyrshah ia ka jingdawa ka Jaidbynriew Meitei ban ai jingithuh lang ha ka thup Scheduled Tribe ka Jylla.
Pule lang ia kane: Pynmih ka Sorkar ia ka Helpline Number ia ki samla ba pule ha Manipur
Ha kajuh ka por, ka Sorkar Pdeng kala peit thuh bha ia ka jinglong jingman kaba long mynta ha Manipur.
U Myntri kam Pohiing Amit Shah hynnin ka sngi Palei ula pynlong jingialang bad ki Heh Ophisar ka Manipur bad ka Sorkar Pdeng lyngba ka video conferencing, ban bishar kam halor ka jinglong jingman.
Ka Northeast Frontier Railway ruh kaba pynsangeh lut ia baroh ki rel kiba dei ban leit sha Manipur namar ka jingkulmar bad jingiaumsnam kaba jia mynta ha kane ka Jylla.
Kumjuh ruh ki shipai Indian Army hynnin ka sngi kila pynmih ia ka jingbthah ban husiar ia ki video thok kiba la pynsaphriang halor ka jinglong jingman hapoh ka Jylla Manipur.
Pule lang ia kane: Pynrem ka KJCLF ia kiba pynjulor ia ki Iingmane ha Manipur
