Shillong, Nohprah 22: U Myntri Sorkar ba peit ia ka tnad Arts and Culture Bah Sanbor Shullai, ha ka sngi Nyngkong, u la pyntip ba u la ting (adopt) ia ka Rilang Children Home kum ka jong u bad kyntu ba lada kane ka jaka ri khunswet ka donkam eiei, dei ban wan mih beit shakhmat ban pynsngew ia ka jingdonkam.
Ia kane u Bah Sanbor Shullai u la pynpaw haba kren ha ka jingialang plie paidbah ia ka madan basketball ha phyllaw jong kane ka jaka ri khun swet ia kaba u la ai ha ka por ba u wan ban rakhe ia ka jingdap 58 snem jong u bad ki khynnah khun swet kane ka jaka ha u bnai Nailar, kaba don ha Nongshillliang.
Ha kane ka sngi ba plie paidbah ia kane ka madan basketball la iadon lang ryngkat bad u Father James Thyrniang ha ka jingsakhi lang ki nongtrei ka BIDS bad ki khunswet kiba shong ha Rilang Children Home.
Haba kren kum u kongsan u Bah Sanbor Shullai u la pynpaw ia ka jingkmen ba u la ioh ban ia don bynta lang bad kane ka jaka ri khun swet ne ka Rilang Children Home bad u la pynbna ruh ba u la ting ia kane ka jaka kum ka jong la jong bad kyntu ba lada don kino kino ki jingeh kim dei ban lehrain ban wan beit sha u.
“Nga dap da ka jingkmen hapoh ka mynsiem namar ba nga la ioh ban leh eiei na ka bynta kine ki khynnah bad nga sngewkmen ba nga ioh ban don bynta lang bad kane ka jaka ri ia kine ki khun,” ong u Bah Sanbor.
Kane ka jingplie ia kane ka madan basketball court ka long kum shi bynta ban ai sngewbha Christmas bad snem thymmai sha baroh ki nongpyniaid jong ka Rilang Children Home bad kumjuh ruh ia ki khun kiba shong basah ha kane ka jaka, ong u Bah Sanbor.
Na ka liang u Father James u la ong, ngim don ei ei bna siew kylliang ia phi Bah Sanbor hynrei tang ka dak ka jingsngewnguh ïaphi.Kane ka jaka ri khunswet, hapoh ka jingialam u Father James Thyrniang ka la pynkup burom kyrpang ruh ia u Bah Sanbor Shullai.
