Shillong, Nohprah 07 : Ka Presbyterian Today International Network (PTIN) kala ting ia ka shnong Kamsing ha West Jaintia Hills District kum ka Free Education Village ha India.
Ia ka jingialang ban ting ia ka shnong la pynlong ha ka 6 tarik Nohprah 2025, ha ka jingiadonlang u Nongiasaid Ain bad President ka Presbyterian Today International Network Bah Daniel Stone Lyngdoh.
Kane ka shnong ka don sha kyndong bha jong ka khappud ka India bad Bangladesh, bad kala iakynduh iashibun ki jingeh ban ioh ia ka pule dangle namar ka jingdon sha kyndong bad ka jing duna ki lad pyniasoh ha ka leit ka wan, ha kaba ki nongshongshnong ki hap ban shaniah ha ka leit ka wan lyngba ka wah da kaba shu kieng lieng baroh shisnem.
U Bah Daniel ula pynpaw ba ka jingthmu ba hakhmat eh haba ting ia kane ka shnong ka long ban kyntiew ia ka pule dangle bad kyntiew ia ka imlang sahlang.
“Ka pule dangle kan iarap ia ki khynnah jong kane ka shnong ba kin sngew hala iing bad saindur iala ka lawei wat hapdeng kiba bun ki jingeh” ula ong.
Ka jingting ia ka shnong Kamsing kum ka Free Education Village ka thmu ban ai ia ki lad pule dangle sha ki khynnah ka shnong bad ban kyntiew ia ka roi ka par jong ka imlang sahlang ha baroh ki liang. Kane ka sienjam la khmih lynti ba kan wanrah ia ka jingkylla kaba bha sha ka shnong bad ki nong shongshnong.
Ha kane ka jingialang la wan iashimbynta ruh da u Daloi ka Elaka Satpator Bah Daman Lakashiang, u Wahehshnong ka Kamsing Bah Augustin Pamblang bad kiwei kiwei.
 kala ting ia ka shnong Kamsing ha West Jaintia Hills District kum ka Free Education Village ha India.){kind=link}