Shillong, Kyllalyngkot 10: Ki pulit jong ka West Garo Hills kila iohkem ia ki 3 ngut kiba la suba jur ba kidei kiba la donkti ha kaban thombor bad lam sha ka jingkhlad noh jong u dkhot ka ACHIK u Dilseng M. Sangma ha Goalgoan kaba hap ha ka jingkhmih jong ka Rajabala Police Station ha West Garo Hills District.
U Superintendent of Police, Tura, ula pyntip ba ka kynhun ki pulit kala pynlong ia ka jingkhynra ha ka miet jong ka sngi Thohdieng, kynthup ia ka iingsah jong u trai ka par maw ia kaba la suba jur ba ula donkti lang ha katei ka kam thombor.
Hynrei haduh mynta, une u trai ka par maw ula phet rieh bad ki pulit ki dang ialeh ban wad bad ban thwet jur ban iohkem noh mardor ia u.
Kumba long mynta, ki paidbah katei ka thain ki don hapdeng ka jingsyier bad ka ACHIK Krima Council kala pynbna ia ka jingiakhih da kaba rah lama ïong mynta ka sngi Saitjain, na Tura shaduh Rajabala. Kane ka seng kala pyntip ruh ba mynta ka sngi yn pyndep ia ka jingleh Post Mortem ia ka met jong u Dilseng.
Kane ka jingjia kala jia ha ka por 2 baje mynsngi ha kaba la kynnoh ba u Dilseng ula shah thombor ha ki briew ki bym lah ban ithuh hapoh ka shnong Goalgoan. La pynkit noh mardor ia u sha Bhaitbari Community Health Centre ban ioh jingsumar bad hadien kane la pynkit noh sha Tura Civil Hospital, hynrei namar ka jingban jur jong ka jingmynsaw kumta ula khlad noh.
Hadien kane ka jingjia, u Superintendent of Police, West Garo Hills ula lum kyrkieh ia ka jingialang ha ka miet jong ka sngi Thohdieng, ia kaba la wan ban iashimbynta da u Deputy Commissioner, ki heh ophisar pulit bad ki nongialam jong ka ACHIK ban khmih ia ka jinglong jingman bad ban pynthikna ban pynneh ia ka shongsuk shongshngain.
Ki bor pyniaid district bad ki pulit, kila kyntu ia ki paitbah ba kin long kiba jai jai bad ban iatreilang bad ki bor kiba dei khmih bad ruh ban kiar ha kaban pynsaphriang ia ki jingtip ki bym don ia ka jingshisha ne kiban pynshit, kiba lah ban pynthud ia ka shongsuk shongshngain.
