Shillong Lber 17: Ki Pulit ka East Khasi Hills, kila pynlong mynta ia ka jingtohkit ban lapdien ia ki briew kiba donkti ban kynshoit ha kaban kem bad bom shnong ia ki arngut ki briew halor ka jingsuba menshohnoh.
Ki Pulit kila pynshai ruh ba kane ka jingjia kaba jia ha ka sngi Saitjain, kam dei satia kaba jia ha ka shnong Lawmei hynrei ka dei kaba jia ha Mawthlong Mynsain kaba hap hapoh ka Thanad Sohiong.
Kat kum ka jingong ki Pulit, la iathuh ba kine ki arngut kiba shah bom shnong ki dei kiba la ithuh kyrteng da u Shiningstar Lawrynniang ba 37 snem bad u Isohlong Kharthangmaw ba 20 snem ka rta.
Haba pyntip ba ka jingtohkit mynta kala iaid shakhmat halor kane ka jingjia, la iathuh ba ki Pulit ka Sohiong kila tohkit mynta ban lap ia ki briew kiba kynshoit, kaba lam sha ka jingkem bad bom shnong ia kine ki arngut ki briew.
Hynnin ka sngi Saitjain ha ka por 11:30 mynstep, ki paidbah kiba la don kumba 200 – 300 ngut kila kem bad kila shoh ia ki arngut ki briew halor ka jingkynnoh bad jingsuba jur ba kidei ki menshohnoh.
Ki Pulit ka Sohiong haba ioh jingtip ia kane ka jingjia, kila hiar wut wut sha katei ka jaka bad hadien la hiar sa ki SOT na Shillong ban tehlakam ia u paidbah.
Ki Pulit bad SOT kila ioh pyllait noh ia kine ki arngut hapdeng ka jingmynsaw kaba jur bad la pynkit noh ia ki sha Sohiong CHC hashuwa ban pynkynriah sha Shillong Civil Hospital ban ai jingsumar.
