Dibrugarh, Lber 17 : U Myntri barim ka Sorkar Pdeng na ka Congress bad u President ka ACMS Paban Singh Ghatowar ula ong ba u Sarbananda Sonowal u dei u Nongialam uba khlain bad hadien ka elekshon, un sa nang ioh ban khmih ia ki Ministry ba kham biang hapoh ka Sorkar Pdeng.
Haba iashimbynta ha ka Jingialang ba shisien shisnem jong ka Assam Branch Indian Tea Association (ABITA) ba 133 ha ka sngi Saitjain, u Ghatowar ula iaroh ia u Sarbananda Sonowal bad ong ba une u nongialam ka BJP na Assam un sa ioh biang ia ka shuki Myntri ha ka Sorkar Pdeng ban ioh bat ia ka Ministry kaba kham biang shuh shuh.
U Paban Singh ula pynpaw ba u tip bha ba u Sarbananda Sonowal un jop da kaba suk na Dibrugrah Lok Sabha seat ha kane ka elekshon ban wan.
Ha kane ka prokram, u Ghatowar ula iashong lang ha kajuh ka rynsan bad u Sarbananda Sonowal bad ai ka jingiaroh bha ia u haba ong ruh ba kum u Myntri ka Sorkar Pdeng bala rangbah bha, un sa rah iakren ia ki kam jong ka karkhana pynmih slasha bad u Myntri Rangbah Duh ka Ri.
Lah ban kdew hangne ba u Sonowal ula pynrem ia u Paban Singh Ghatowar ha ka sien ba nyngkong eh na Dibrugarh Lok Sabha Seat ha u snem 2004. Hadien kane, ula iakhun noh na ka ticket jong ka AGP.
