Shillong, Jymmang 26 : Ki Pulit ka East Khasi Hills, kila pynlong ia ka jingthwet kaba jur ban lapdien ia u riew jaboh uba donkti ban khyllie skad ia kawei ka khynnah skul ba dang iaid lynti ha ka thain Umsohsun, Shillong.
“Ngi la register da ka suo moto case halor kane ka jingjia bad la pynngat hapoh ki kyndon jong ka Protection of Children from Sexual Offences (POCSO) Act” ong u Superintendent of Police ka District Bah Vivek Syiem.
Ki Pulit kila shimkhia ia kane ka case hadien ba ka video bala iohring da ka kor CCTV, kala saphriang kylleng sawdong, kaba pyni ba une u riew jaboh bala kah durkhmat, ula khyllie skad jubor ia kawei ka khynnah skul ha ryngkat bad ka ring video da ka mobile, ha Umsohsun. Kane ka jingjia kala jia ha ka step sngi Thohdieng.
Kat kum ka jingiathuh u SP “Ngi la buh ia ka kynhun ka ban bishar bniah kyrpang ia ki video ba ring da ki kor CCTV ba pyndait ha kane ka thain. Sa kawei pat ka kynhun la buh ban ithuh bad kem ia une u briew ba donkti. Ki jingpyrshang baroh kila iaid shaid shaid halor kane ka kam”.
U Rangbah Shnong ka Umsohsun Bah Tribelget Dkhar, ula pynrem jur ia kane ka jingjia ha ka kyrwoh bala pyllait ha ka sngi U Blei. Ula kyntu ruh ia ki nongshongshnong ba kin peitngor bha bad ban pyntip ia kano kano ka jingishankhmat sha ki bor ka ain khlem da pynslem.
