Shillong, K’lyngkot 10 : Ka Sorkar Jylla kala thungkam pura biang ia ka jingshakri jong ki 850 ngut tam ki nongtrei kiba thung adhoc kat kum ki kam kiba lait.
Ia kane ka rai la mynjur da ka jingialang ba nyngkong eh jong ka Kynhun Myntri ba long mynta u snem, kaba la pyniaid da u Myntri Rangbah ka Jylla Conrad K Sangma hynne ka sngi Thohdieng ha Sohra.
Ha u 2022, ka Sorkar kala thungkam pura ia palat 3000 ngut ki nongtei adhoc, kiba la shah thungkam hashuwa u 2007 , haba pyntreikam ia ka jingbthah jong ka Iingkashari Supreme Court.
Haba iakren bad ki lad pathai khubor, u Conrad ula ong ba ki dang don bun bha ki nongtrei Adhoc, kiba la shah thungkam hashuwa u snem 2007, kiba la duh ia ka lad kaba la leh ha u 2022.
“Ki dang don sa kumba 800-850 ngut eiei kat kum ka thup, kiba la duh ha ka por ba ai jingmynjur ka Kynhun Myntri ha u snem 2022….kumta ka Sorkar mynta ka sngi kala rai ban thungkam pura lem noh ia ki. Ngi la bynrap ia kine ki 850 tam ha ka thup kiba la duh ha ka por ba thungkam pura nyngkong eh” ula bynrap.
