Shillong, Naiwieng 13 : U Vice Chancellor ka NEHU Prof PS Shukla hynne ka sngi Balang, ula thung ia ki arngut ki Pro Vice Chancellor ka Shillong bad Tura Campus.
Kine ki arngut ki dei ka Prof Sherwin May Sungoh jong ka Tnad Education, ka ban shimti kum ka Pro Vice Chancellor ka Shillong Campus bad ka Dr Fameline K Marak jong ka Tnad Garo, kum ka Pro Vice Chancellor ka Tura Campus.
Kane ka rai jong u VC kala mih hapdeng ka jingiakhih shah thngan jong ki samla pule kiba don hapoh ka lama jong ka North Eastern Hill University Students Union (NEHUSU) bala kyrshan da ka Khasi Students Union-NEHU Unit, kaba la jam mynta ia ka khyndai sngi.
Ia kane la hukum la pynmih da u Assistant Registrar (Planning) kaba iaid kat kum k Ain bad ki statutes jong ka University.
