Shillong, Jylliew 06 : Ki Bor District ka West Jaintia Hills ha ka sngi Palei, kala thung ia ka Inquiry Committee ban tohkit halor ka jingiap jong ka Longkmie Kong Pynche Bareh bad I Khunlung ba dang pun ha kpoh, ha Maternal & Child Health Hospital ha Jowai.
“Khnang ban lap ia ka jingshisha bad kiei kiba jia kiba lam sha kane ka jingjia ba sngewsih bad ban pynthikna ia ka jingkitkhlieh, la thaw ia ka Committee ka ban tohkit bniah ia kane ka kam” ong u Abhinav Kumar Singh, Deputy Commissioner ha ka hukum.
Ka kong Pynche Bareh kaba dang armet, kala khlad ha kane ka hospital Sorkar ha ka miet sngi Balang.
Ia kane ka Committee yn khlieh da u Additional Deputy Commissioner B Blah. La bthah ia ka Committee ban pyndep ia ka jingtohkit bad aiti ia ka kaiphod hapoh ka 9 tark Jylliew.
Kat kum ki kyndon tohkit bala buh, la bthah ia ka Committee ba kan bishar ia ki jingjia naduh kaba sdang bad ki jingsumar bala ai naduh ba wan shah sumar ka nongpang bad ki jingsumar, ban pynshisha ia ka jingbud ne em ia ka Standard Operating Procedure (SOP) bad Medical Procedure, ban pynthikna la ka don ka jingpynslem, ka jingkhein sting, lane jingbym biang na ka liang ki nongtrei ka hospital, ban shim ia ki jingbatai (statement) na ki nongtrei ka hospital, ki bahaiing hasem jong ka Longkmie ba khlad bad ruh na kiwei kiwei ki kynhun ba sngewkhi bad ban ai ruh ia ki jingai jingmut ban pynbeit ia kane ka kam, lada donkam, kynthup ia ki lynti ban pynthikna ba kum kine ki jingjia kin ym jia shuh.
La bthah ba ki Ophisar kynthup u/ka Superintendent ka MCH Hospital ki dei ban ai ka jingiatreilang kaba pura bad ka Committee bad ban ai lut ia baroh ki kot ki sla bad ki jingtip haba pan ne donkam.
