Shillong, Naitung 28 : Ka Sorkar Pdeng kala thung ia u Chandrashekhar H Vijayashankar kum u Lat ba thymmai ka Jylla Meghalaya hadien ka jingpynkynriah kam ia ki Lat ki Jylla bala pynbna paidbah ha ka janmiet 27 tarik Naitung.
U Vijayashankar u dei u MLA barim ka Karnataka Legislative Assembly ha u snem 1994. Ha u 1998, ula shah jied kum u Dkhot ka Lok Sabha na Mysore Lok Sabha Constituency. Ula shah jied biang kum u MP ka Mysore ha u snem 2004.
U Vijayashankar ula shakri kum u Myntri ha ka Sorkar Karnataka bad bat ia ki tnad kynthup ia ka Tnad Forest bad Small Scale Industries. Ula shah rem noh ha ka elekshon 2014 Lok Sabha na Hassan Constituency kum u kyrtong ka Bharatiya Janata Party.
Nalor kane, ula dei ruh u dkhot ka Karnataka Legislative Council naduh ka 15 tarii Jylliew 2010 tad haduh ba kut ka samoi treiam ha u Kyllalyngkot 2016.
U Vijayashankar ula iehnoh kam na ka BJP bad leit iasoh sha ka Indian National Congress ha u Risaw 2017. Hynrei ha u 2019 ula leit ban pyniasoh biang ialade sha ka BJP.
