Shillong, Naitung 25: Ka Sorkar Jylla ha ka sngi Ba-ar, kala pyntip paidbah ia ka jingthaw ia ka State Education Commission ha kaba u Prof SM Sungoh, Department of Education, North Eastern Hill University (NEHU) un shimti kum u Chairperson.
U Prof David Reid Syiemlieh, (Adviser Academic) Chairman barim ka UPSC bad Tony TC Marak (Adviser School Sector Reforms), Retd IFS bad Executive Chairman barim ka MBOSE, kin dei ki nongaibuit jong ka Commission katba u Ambrose Ch Marak, Secretary in-charge Education Department kum u Member Secretary.
Ka jingpynbna bala pynmih halor kane ka ong ba kane ka State Education Commission kan sdang ban treikam noh mardor bad ka samoi treikam jong ka, kan long arsnem.
Ki kyndon treikam jong ka Commission ka long ban ai jingmut ia ka Sorkar Jylla halor ki kam ba iadei bad ki rukom pyniaid ia ki skul bad college, ka jingshna tulop ia ki skul/college, ka jingtreikam ki school management, ai jingmut ia ki lynti bad ki buit bad ki policy ban wanrah jingkylla ia ka rukom pyniaid ia ki school bad higher education kat kum ka NEP-2020 bad ban ai jingmut ia ki jingpynkylla bad ki policy ha kaban nang pynjanai ia ka pule ka dangle ha ki skul, college bad ki jaka pule jong ka Higher & Technical Education.
Ka kamram bad ka jingkitkhlieh jong ka Commission ka long ban khmih ia baroh ki kam kiba ktah ia ka kam pule dangle ha Meghalaya, ki kam ba iadie bad ka jingpyniaid ia ki Aided school bad college, ka jingtreikam bad jingshai ka jingtreikam ki SMC, ban pynwan lang kawei ia ki skul bad college ba ai jingiarap ka Sorkar, ban wanrah ia ka lynti ka ban pynthikna ia ka jingsiew tulop ba mar katjuh ia ki Nonghikai kiba hap hapoh ki Aided categories haba phai sha ki nonghikai Sorkar, ka lynti ban shim halor ki ishu jong ki nonghikai SSA, ban pynshong nongrim ia ki skul haba iadei bad ki skul bym trei kam, ki skul ba tam, ki skul ba duna khynnah, ki skul ba tang iwei I nonghikai, ka jingeh ba iadei bad ka jingbym don ki nonghikai ia ki ktien bapher bapher khamtma ha Khappud, ban pynwandur thymmai ia ka Meghalaya State Education Policy kat kum ka NEP 2020, ban ai ia ki kyndon/jingai jingmut halor ki syllabus bad curriculum jong ki skul bad kiwei kiwei.
Ki Co-opted member jong ka Commission ki kynthup ia Dr. (Mrs) C A R Diengdoh, Retd CDC NEHU, Shillong, Dr. (Mrs) Vanessa Kharmawphlang, Retd Principal, CTE (PGT) Shillong, Dr. (Mrs) Nikme Salse Ch. Momin, Professor NEHU, Tura Campus, Shri. P Ryngksai, Retd. Addl. Director of School Education & Literacy, Shillong, Dr. Charles Reuben Lyngdoh, Associate Professor, Synod College, Shillong, Dr. Sanggra A Sangma, Associate Professor, Department of History, Don Bosco College, Tura, Shri. Rahul Chatterjee, Assistant Lecturer (Physics), Jail Road Boys’ Higher Secondary School, Shillong, Brother Solomon T Morris, Principal, St. Edmunds School, Catholic Christian Brother Institution, Shillong, Shri. Richard Uriah, Principal North Liberty Hr. Sec. School, Jowai, Shri. F C Shullai, Retd Primary School Teacher, Polo Hills, Shillong, Shri Aaron Warjri, Principal Shillong Public School, Shillong and Dr. (Fr) Philip Abraham S.J., Principal Loyola College & Loyola HSS, East Garo Hills, Williamnagar.
 un shimti kum u Chairperson.){kind=link}