Shillong, Nailur 25 : Ka Kynhun Myntri ka Sorkar Jylla ha ka sngi Balang, kala mynjur ban thung ia u Ophisar IPS bala shongthait Bah H Nongpluh kum u non-judicial member ka Meghalaya Human Rights Commission (MHRC).
Haba kren sha ki lad pathai khubor, u Myntri Rangbah Conrad K Sangma ula ong “Hadien ka jingshongthait noh jong uwei na ki non-judicial member hapoh ka MHRC, ngi don ia ka Selection Committee kaba la khlieh da u Myntri Rangbah, kaba la tyrwa ia ka kyrteng u Bah H Nongpluh, IPS bala shongthait ban long u non-judicial member ha ka MHRC. Ia kane ka jingtyrwa la ai jingmynjur da ka kynhun Myntri”.
Ula pyntip ruh ba ka kynhun Myntri kala ai jingmynjur ruh ia ka jingai jingmut jong ka Committee bala khlieh da u Chief Secretary halor ka jingthung ia u Lt Col Sebastian Marbaniang kum u Zilla Sainik Welfare Officer, Shillong.
Ka kynhun Myntri kala mynjur ruh ia ka thup jong ki shuti na ka bynta u snem 2025, kaba la wanrah da ka Tnad GAD.
.){kind=link}