Shillong, Nohprah 02 : Ka kynhun Myntri ha ka sngi Nyngkong kala thung ia u Ophisar Meghalaya Agriculture Service (MAC) bala shongthait Bah Macbul Lyngdoh Suiam kum u Chief Administrative Officer ka Meghalaya Natural & Organic Farming Society for Livelihood and Innovation in Agriculture (MNOFSLIA).
Haba kren sha ki lad pathai khubor,u Myntri Sorkar Bah Paul Lyngdoh ula ong “Ia kane ka kam la wanrah sha ka jingialang ka Kynhun Myntri bad ngi la mynjur ia ka jingtyrwa ban thung ia une u Ophisar bala shongthait kum u CAO ka MNOFSLIA na ka bynta3 snem”.
U Bah Paul ula pyntip ruh ba ka Kynhun Myntri kala mynjur ban thung ia u Registrar cum Secretary ka Meghalaya State Consumer Dispute Redressal Commission (MSCDRC).
“Ar-lai tylli ki kyrteng kila mih ban ai jingmynjur da ka Kynhun Myntri kat kum ka jingai jingmut jong ka Tnad ba dei khmih, ka Food & Civil Supplies & Consumer, ka Kynhun Myntri kala mynjur ban thung ia ka kong Susana D Ritshong, MSS bala shongthait na kine ki kyrtong bala jied” ula ong.
