Shillong, Naiwieng 23 : Ka Sorkar Meghalaya kala thung ia ka jingtohkit halor ka jingiap ba suba sniew jong ki arngut ki samla na Shillong ha ka Rehabilitation Centre ha Assam.
Ia kane la pynthikna da u Myntri ka Tnad Social Welfare Bah Paul Lyngdoh hynne ka sngi Saitjain.
“Kane kala wan sha ngi kum ka jingpyntip ba nyngkong hynnin ka sngi. Mar syn wan kane ka jingpyntip, nga la bthah ia u Principal Secretary ban sdang ia ka jingtohkit bad ban wad ia kaei kaba jia” ong u Bah Paul haba bynrap “Nga dei ban ioh ia ka kaiphod ha ka sngi Nyngkong por shiteng sngi”.
Kine ki arngut ki samla kiba iap ki dei kiba kyrteng u Rickelson Jyrwa, uba sah ha Golfline bad u Meban Syndor ba na Mawlai Mawtawar. Kine ki arngut kila leit shah sunar ha ki artylli ki Centre-ka Better Living Wellness Foundation ha Mangaldai, Assam bad ka Alive Again Foundation ha Chandrapir, Hatisila, Guwahati.
Ka Meghalaya Users Forum (MUF) kala kem ba kine artylli ki Rehabilitation Centre ki dei kiba long trai da u Arup Jerial Passah uba la iatreilang ha Better Living Wellness Foundation bad u Sabir Khan bad ha Alive Again Foundation bad u Shahid.
Ka MUF kala kynnoh ba ia ka metiap u Meban Syndor la aiti da ki bor pyniaid ka Centre na Jorabat, Assam sha ki bahaiing khlem ka jingiadon bynta ki Pulit ne ka jingleh ia ka post mortem.
