Shillong, Rymphang 12: Ka President jong ka ri India ka Draupadi Murmu, hynne ka Sngi U Blei kala thung thymmai ia 6 ngut ki Lat ha ki jylla bapher jong ka ri India kynthup ia u Phagu Chauhan kum u Lat ka jylla Meghalaya.
Ka President kala thung ia u Justice (Retd.) S. Abdul Nazeer kum u Governor jongka Andhra Pradesh katba u Governor ba mynta u Biswa Bhusan Harichandan yn leit ban shimti noh kum u Governor ka Chhattisgarh.
U Myntri khynnah barim ka sorkar pdeng u Shiv Pratap Shukla yn shimti noh kum u Lat bathymmai jong ka Himachal Pradesh katba u Rajendra Vishwanath Arlekar pat yn leit ban shimti noh kum u Governor ka Bihar.
U Phagu Chauhan, uba long u Governor ka Bihar yn leit ban shimti noh kum u Governor ka jylla Meghalaya.
U Myntri barim jong ka sorkar pdeng u C.P. Radhakrishnan ula shah thung kum u Governor ka Jharkhand katba u Governor barim ka Jharkhand u Ramesh Bais yn leit shimti noh kum u Governor ka Maharashtra.
Ka jingshah thung u Bais kum u Lat kadei hadien ba u Bhagat Singh Koshyari ula resaiñ noh na ka kam Governor.
U Gulab Chand Kataria yn long noh u Governor bathymmai ka Assam katba u Lakshman Prasad Acharya yn long noh u Governor ka Sikkim.
U La. Ganesan uba long u Governor ka Manipur yn leit ban shimti noh kum u Governor ka Nagaland, katba u Anusuiya Uikye uba long u Governor ka Chhattisgarh yn shimti noh kum u Governor ka Manipur.
U Brig. (Dr.) Shri B.D. Mishra (Retd.) uba long u Governor barim ka Arunachal Pradesh bad Meghalaya ula shah thung noh kum u Governor ka Ladakh.
Ha ka jaka u BD Mishra, ia ka kam Governor yn shimti noh da u Governor ka Bihar u Phagu Chauhan, bad u Governor ka Himachal Pradesh u Rajendra Vishwanath Arlekar yn leit ban shimti noh kum u Governor ka Bihar.
Kane ka jingshah thung ki Lat ka jylla kan sdang treikam naduh ka sngi ba ki leit ban shimti iaka kam ha ka ophis jong ki.
Ka President kala mynjur ruh iaka shithi iehnohkam jong u Radha Krishnan Mathur kum u Lat ka jylla Ladakh.
