Shillong, Rymphang 27 : Ka National People’s Party (NPP) kala thung ia u nongialam bala rangbah bha ha ki kam sain pyrthei Mmhonlumo Kikon kum u National General Secretary (Political) ba thymmai.
Kane kala wan jia ruh ha ka por ba ka NPP kala jam shakhmat ban wanrah ia ka jingiatylli ki seng sain pyrthei hapoh ka thain Shatei Lam Mihngi hapoh ka thong “One Northeast”.
Kat kum ka jingpynbna bala pynmih da u National President bad Myntri Rangbah ka Meghalaya Conrad K Sangma ha ka 11 tarik Rymphang, 2026, ia u Kikon la bynshet da ka bynta ban wanrah ia ka jingiatreilang bad ki seng sain pyrthei ha kylleng ki Jylla ka thain Shatei Lam Mihngi.
Kane ka jingthungkam, kaba la leh hapoh ka Article 11 jong ka riti treikam ka Party, ka pyni ia ka jingpyrshang ba thymmai jong ka NPP ban pynkhlain ia ka jingsuhthied ha ka thain bad ban shutnep ia ki buit iatreikam lang hapoh ka thong “One Northeast”.
Kum u Secretary (Political), u Kikon un ialam ia ka jingpynbeit ryntih ia ki jingiakren bad jingiatreilang bad ki seng sain pyrthei nalor ki kynhun bapher bapher kiba don bynta ha kasain pyrthei ha kylleng ka NE, ban pynkhreh lypa ia ka jingiakren, ban iatrei ryngkat ryngkat ki State President bad ki Nongkitkam ha kaban bishar kam halor ka jinglong jingman ka sain pyrthei, ka jingpynkhreh ia ki elekshon, bad ka kam pynkhlain ia ka party na kawei ka Jylla sha kawei pat.
La bynshet ha u ba un pynlong ia ki jingiasyllok ba man ka por bad ki MP, ki MLA bad kiwei ki nongmihkhmat paidbah jong ka party ha kaban pynthikna ia ki policy kaba pynrung lang ia ki jingai jingmut bad ka jingpynlait khubor kaba long kawei ka sur.
Un pynwandur bad khmih ia ki kam sain pyrthei, ki jingialang, ki jingiasyllok bad ki kam ban pyniar ia ka jylli treikam jong ka party.
Ka jingpynbna ka bthah ia baroh ki State Unit bad ki nongtrei ka party ba kin ai ka jingiatreilang kaba pura ha kaban pyntrei ia kine ki jingkitkhlieh bala bynshet.
 kala thung ia u nongialam bala rangbah bha ha ki kam sain pyrthei Mmhonlumo Kikon kum u National General Secretary (Political) ba thymmai.){kind=link}