Shillong, Nailar 20 : Myntri ka Tnad Bording AT Mondal ha ka sngi Ba-ar, ula pyntip ba ka Sorkar Jylla kala thung Consultant ban wad ia kawei pat ka lynti iaid (surok) ka ban pynthikna ba baroh ki kali kiba wan sha Shillong kin ym donkam shuh ban iaid lyngba ka jingkieng Umiam.
Haba iakren bad ki nongthoh khubor,u Mondal ula ong ba halor ka ISBT ha Mawiong, kan donkam katto katne por ba ioh ia ka surok iaid ka ban lah pynlong ia kane ka Terminal kaba treikam kumba la thmu ban long.
“Ka Sorkar kala thung Consultant bad kila wad mynta ia ka lynti iaid/surok na kawei pat ka jaka khnang ba baroh ki kali kin lah ban wan sha Shillong” ula bynrap.
U Mondal ula ong ba ka jingkylli kam mih satia ha kaban weng noh ia ka jingpyrrkhing halor ka jingkhia jong ki kali kiba iaid lyngba ka jingkieng.
“Ka jingpyrrkhing kan dang neh slem namar katba nang iaid ka por, ka jinglong jong ka jingkieng ruh kan nang tlot,kumta, kumno ngin khmih lynti ba yn weng noh ia ki jingpyrrkhing bala buh” ula kylli.
“Kat kum ki Consultant, kila pynpaw ba ym dei ban shah ia ki kali ba khia palat 9 MT ba kin iaid lyngba ka jingkieng..ta ka daw ngi la buh ia ka jingpyrrkhing” ula bynrap.
