Tura, Lber 28: U Myntri Rangbah ka Jylla u Conrad K Sangma, ula pynpaw ba u don ia ka jingiohi jngai ban tei ia ka lawei kaba don ia ka jingskhem jingmut, kaba sbun bad ki nongshong shnong kiba don ia ka jingkitkhlieh ki ban noh synniang shi katdei ia ka imlang sahlang.
Ban pynurlong ia katei ka jingthmu, u Myntri Rangbah ula pynpaw ba u don ia ka jingmut kaba skhem ba ka jingiadei lyngba ka jingiakren, ka jinglah ban ai jingkren kaba paka bad kiba don ia ka nongrim kaba skhem bad ia ka jingpyrkhat kaba bha ki long kiba kongsan bha, kaba ia ryngkatlang bad ka jingdon ia ka kyrdan ha ka pule puthi bad ula banjur ba ka jingioh ia ka jinghikai lyngba ka pule puthi kam dei tang ban kiew ha ka jingioh ia ka jingnang jingstad hynrei kan tei ruh ia ka jinglong u briew, ban long kiba skhem jingmut ban ban saindur ia ka sap ha ka jingim jong ki khynnah.
U Myntri Rangbah ula kren ia katei ha ka SPARK Summit 2025, kaba la long ha ka District Auditorium ha Tura hynne ka sngi Thohdieng.
Kane ka Summit kadei kum shi bynta jongka jingdap shi snem jong ka prorkam ka SPARK (School Programmes in Articulation, Resilience, and Kindness), ka sienjam kaba la shim da ka tnad pule puthi ka sorkar jylla hapoh jongka Samagra Shiksha.
Ula ong, ba ka sienjam kaba la shim da ka SPARK kala pyni shisha ba ka long kaba suk hynrei ka jingpynleit jingmut ha ka jingiadei lyngba ka jingiakren, ki jingtbit kiba malu mala, ka rukom pyrkhat kaba bha bad ka jingsbun ki lah ban pynkylla ïa ki jingmut jingpyrkhat ia kiba dang khynnah. Ula ong ruh, ba kane ka sienjam kala pynkup bor ïa ki khynnah pule da ki sap kiba kyrpang ba kin pynkhreh iala ka jingim lada ki mad ia kino kino ki jingtynjuh.
Ula pynpaw ruh ba ka SPARK prokram kala wanrah ia ki jingkylla kiba lah ban iohi ha ka jinglong jingman ki khynnah, ka jingskhem jingmut bad ka jingdonbynta ha kaba iadei bad ka pule puthi ha kylleng ki skul ha ka West Garo Hills. Ula kdew ruh ba kane ka prokram kala iarap ia ki khynnah ba kin nang ban kren bha bad ban don ia ka rukom pyrkhat pyrdain kaba long janai.
Ula pynthikna ba ka Sorkar Meghalaya ka iengskhem ban pynkhlain ha ka liang ka pule puthi bad kan iai bteng ban ai jingkyrshan ia ki sienjam kiba long thymmai kum ka SPARK kiban kyntiew ha baroh ki liang ia ka jingim jong ki riewshimet.
Ula ong ruh, ba ki sienjam kum ka SPARK ki long kiba iaid ryngkat bad ka thong jong ka Education Policy ka Sorkar Jylla kaba iar, kaba phaikhmat sha ka jingpule kaba don jingmut, kaba tei ia ka longbriew manbriew bad kaban don ia ka jinglong nongialam. Ula pynshlur ia ki kmie ki kpa, ki nongialam ha ka imlang sahlang bad ki nongialam shnong ba kin iashimbynta lang bad ki skul bad ki prokram kum ka SPARK ban pynthikna ba ki jinglong kiba kordor jong ka jingsbun bad ka jinglah ban ai jingkren kaba paka la ka long hapoh iing ne ha ka shnong ka thaw.
U Myntri Rangbah ula ong ruh, ba ka sorkar kan wad ia ki lad ki lynti ban nang pynheh ia ki sienjam jongka SPARK sha kiwei pat ki District, ban pynlong ia ka kum ka prokram kaban long ka nuksa na ka bynta ban tei ia ki khynnah pule ha kylleng ka jylla Meghalaya.
Ha kane ka prokram u Secretary bad u State Project Director u Swapnil Tembe, ula ai iaka kaiphod treikam jong ka SPARK ha kaba ula pynpaw ruh ia ki jingseisoh jong kane ka sienjam.
Ha kane ka jingialang, la ioh ruh iaka jingpynsngew na ki khynnah skul bad ki nonghikai halor ka jingshem ka jongki bad ia ka jingkylla kaba la ioh lyngba ka SPARK ha ka jingim kaba shimet bad ka jingkiew ha ka pule puthi.
La pynkut ia kane ka prokram da kaba sam ia ki Tablet bad ka jingpynkup burom ia ki Principal jong ki skul, ki nonghikai bad ki khynnah skul halor ka jinglong nongialam bad ka jingseisoh ka jongki hapoh jong ka SPARK bad la ioh ruh iaka prokram ha kaba iadei bad ka kolshor na ki khynnah pule jong ka Dadenggre Puri Government Higher Secondary School bad Government Girls’ Higher Secondary School, Tura, kaba la nang pynshongkun ia kane ka jingrakhe.
